ەنەرگەتيكا ءمينيسترى الماسادام ساتقاليەۆ وڭىردە ستۋدەنت جاستارمەن, «كوكشەتاۋ-ەنەرگو» سەرىكتەستىگىنىڭ ۇجىمىمەن كەزدەسىپ, بەيبىت اتوم ەنەرگەتيكاسىن دامىتۋدىڭ كەلەشەگى ماسەلەسىن تالقىلادى.
مينيسترلىك باسشىسىمەن كەزدەسۋگە ش.ءۋاليحانوۆ كوكشەتاۋ مەملەكەتتىك ۋنيۆەرسيتەتىنىڭ, ا.مىرزاحمەتوۆ اتىنداعى كوكشەتاۋ ۋنيۆەرسيتەتتىڭ, م.عابدۋللين اتىنداعى ازاماتتىق قورعاۋ اكادەمياسىنىڭ, گۋمانيتارلىق-تەحنيكالىق اكادەميانىڭ ستۋدەنتتەرى قاتىستى. باستى تاقىرىپ بەيبىت اتوم توڭىرەگىندە بولدى. بولاشاقتىڭ جايىن باعامداعان كەزدەسۋ بارىسىندا مينيستر اتوم ەنەرگەتيكاسىنىڭ ەلىمىز ءۇشىن قانشالىقتى ماڭىزدى ەكەنىنە تەرەڭىرەك توقتالىپ, دامۋى مەن قاۋىپسىزدىگى توڭىرەگىندە وي تولعادى. مينيستر ەلىمىزدە ەلەكتر ەنەرگياسىن ءوندىرۋدىڭ نەگىزگى ۇلەسىن, جالپى ءونىمنىڭ 66 پايىزىن قامتاماسىز ەتەتىن كومىر ستانسالارى قۇرايتىنىن, جاڭارتىلعان ەنەرگيا ءوندىرۋ ۇلەسى شامامەن 6 پايىز ەكەنىن ايتىپ ءوتتى. ەلەكتر ەنەرگياسىن پايدالانۋ كولەمى ءبىر ورىندا تۇرمايتىنى بەلگىلى. 2035 جىلعا قاراي تۇتىنۋ كولەمى ساعاتىنا 152,4 ملرد كۆت قۇراۋى مۇمكىن. بۇل رەتتە قازىر جۇمىس ىستەپ تۇرعان ەنەرگيا كوزدەرىن ءوندىرۋ بىرقاتار وبەكتيۆتى سەبەپكە بايلانىستى تومەندەيدى. وسىعان بايلانىستى 2035 جىلعا قاراي جالپى قۋاتى 26,5 گۆت بولاتىن جاڭا گەنەراتسيالاۋشى قۋاتتاردى ىسكە قوسۋ قاجەتتىگى تۋىندايدى.
قازىر بۇكىل الەم كومىرتەگىنە بەت بۇرىپ جاتىر. سوندىقتان حالىقارالىق قارجى ينستيتۋتتارى كومىر ەلەكتر ستانسالارىنىڭ قۇرىلىسىنا ينۆەستيتسيا سالۋعا قۇشتار ەمەس. قازاقستان ەلىمىزدەگى گاز رەسۋرستارىنىڭ ءبىرشاما شەكتەۋلى بولۋىنا بايلانىستى گاز گەنەراتسياسىن كەڭىنەن ەنگىزۋدى جۇزەگە اسىرا المايدى. دەمەك جاڭارتىلعان ەنەرگيا كوزدەرىنىڭ جۇمىسىن بولجاۋ قيىن. اەس قۇرىلىسى توقتاپ تۇرعان قۋاتتاردى الماستىرۋدىڭ جانە ەنەرگەتيكالىق تاۋەلسىزدىكتى قامتاماسىز ەتۋدىڭ بىردەن-ءبىر دۇرىس شەشىمى بولماق دەگەن پىكىر ايتىلدى.
مينيستر ستۋدەنتتەرگە يادرولىق رەاكتورلاردى پايدالانۋدىڭ الەمدىك تاجىريبەسى, قاۋىپسىزدىكتى قامتاماسىز ەتۋدىڭ زاماناۋي شارالارى تۋرالى كەڭىنەن تاراتىپ ايتىپ بەردى. اشىق پىكىر الماسۋعا جاستار بەلسەندى ارالاسىپ, اتوم ەنەرگەتيكاسىنىڭ بولاشاعى, ونىڭ ەكولوگيالىق قاۋىپسىزدىگى جانە ەكونوميكالىق ءوسۋدى قامتاماسىز ەتۋدەگى ءرولى تۋرالى سۇراقتار قويىپ, تۇششىمدى جاۋاپ الدى. ماڭىزدى ماسەلەلەر تالقىلانعان جۇزدەسۋ بارىسىندا ەل ەرتەڭىنە سەنىممەن قارايتىن جاستار ەلىمىزدەگى اتوم ەنەرگەتيكاسىنىڭ بولاشاعى مەن تۇراقتى دامۋعا قوساتىن ۇلەسى تۋرالى جان-جاقتى حاباردار بولدى.
ەنەرگەتيكا ءمينيسترى وبلىس ورتالىعىنداعى «كوكشەتاۋ-ەنەرگو» جشس جۇمىسىمەن تانىسىپ, كاسىپورىن ۇجىمىمەن كەزدەستى. بۇل جەردە دە اتوم ەلەكتر ستانساسىنىڭ قانشالىقتى ماڭىزدى ەكەنى جان-جاقتى ءتۇسىندىرىلدى. ەل ەكونوميكاسىنىڭ تۇراقتى دامۋى ەلەكتر ەنەرگياسىنا سۇرانىستىڭ ارتۋىمەن قاتار جۇرەتىنىن بۇل ۇجىم جاقسى بىلەدى. ونەركاسىپ, مەتاللۋرگيا, كولىك, ءىت, فارماتسەۆتيكا, اۋىل شارۋاشىلىعى ونىمدەرىن قايتا وڭدەۋ باعىتىنداعى جاڭا جوبالاردى ىسكە اسىرۋ ءۇشىن قازىردىڭ وزىندە ەلەكتر ەنەرگياسىنا دەگەن سۇرانىس جوعارى.
كوكشەتاۋ