پرەمەر-ءمينيستردىڭ ورىنباسارى تامارا دۇيسەنوۆا پارلامەنت دەپۋتاتتارىمەن كەزدەسۋ وتكىزىپ, وندا ەل پرەزيدەنتىنىڭ تاپسىرمالارىن ىسكە اسىرۋ شەڭبەرىندەگى شارالاردى ۇسىندى. كەزدەسۋگە وقۋ-اعارتۋ, عىلىم جانە جوعارى ءبىلىم, ەڭبەك جانە حالىقتى الەۋمەتتىك قورعاۋ مينيسترلەرى, سونداي-اق جوعارى وقۋ ورىندارىنىڭ باسشىلارى قاتىستى.
ۆيتسە-پرەمەر ەلدەگى شەتەلدىك جوعارى وقۋ ورىندارى فيليالدارىمەن جۇمىس ىستەۋگە نازار اۋداردى. بۇل باعىتتا عىلىم جانە جوعارى ءبىلىم مينيسترلىگى ءبىلىم بەرۋ باعدارلامالارىن, وقىتۋ تەحنولوگيالارىن ترانسفەرتتەۋ ماسەلەسىن كوتەردى. ستۋدەنتتەردىڭ ءبىلىم دەڭگەيىن, قۇزىرەتى مەن داعدىسىن باعالاۋ بولىگىندە ولاردىڭ جۇمىسىنا بىرىڭعاي تالاپتار قابىلداۋدى جوسپارلاپ وتىر. وتاندىق جوعارى وقۋ ورىندارىنىڭ باسەكەگە قابىلەتتىلىگىن ارتتىرۋ ءۇشىن ءبىلىم بەرۋ ساپاسىن تاۋەلسىز باعالاۋ ۇيىمداستىرىلادى. بۇل رەتتە نەگىزگى كريتەريلەر – ەكونوميكالىق ىنتىماقتاستىق پەن دامۋ ۇيىمى ەلدەرى قولداناتىن كورسەتكىشتەر. باعالاۋ ناتيجەلەرى بويىنشا جوعارى وقۋ ورىندارى ليگالارعا بولىنەدى.
– جاڭا ەرەجەلەر ءبىلىم بەرۋ گرانتتارىن بولۋگە دە اسەر ەتەدى. الداعى جىلداردا گرانتتار جوعارى وقۋ ورىندارىنىڭ كىرەتىن ليگاسىنا قاراي جانە ۇلتتىق بىرىڭعاي تەستىلەۋدە جوعارى بالل العان, بىراق كونكۋرس اياسىندا وتە الماي قالعان تۇلەكتەردى قولداۋ ماقساتىندا سارالانادى, – دەدى ت.دۇيسەنوۆا.
ليگالارعا ءبولۋ كوللەدجدەر اراسىندا دا جوسپارلانعان. مەملەكەت باسشىسى كەلەسى جىلدى «جۇمىسشى ماماندىقتارى جىلى» دەپ جاريالادى. وسىعان بايلانىستى تەحنيكالىق جانە كاسىپتىك ءبىلىم بەرۋ ۇيىمدارى ترانسفورماتسياسىنىڭ كەشەندى جوسپارى دايىندالىپ جاتىر. ورتا ءبىلىم بەرۋ ساپاسىن ارتتىرۋ ماقساتىندا وڭىرلەردە تىرەك مەكتەپتەر جەلىسىن قۇرۋ, شاعىن جيناقتى مەكتەپتەردى ترانسفورماتسيالاۋ بويىنشا جۇمىس جالعاسادى. سونداي-اق جىل سوڭىنا دەيىن «جايلى مەكتەپ» جوباسى اياسىندا سالىنعان مەكتەپتەردى باسقارۋ جۇيەسىنىڭ جاڭا مودەلى بەكىتىلەدى.
– قارجىلاندىرۋ كوزدەرى ناقتىلانا وتىرىپ, الداعى 3 جىلدا 1 300 مەكتەپتى كۇردەلى جوندەۋ جوسپارى 1 جەلتوقسانعا دەيىن ازىرلەنەدى. مەملەكەتتىك قولداۋدىڭ اشىقتىعىن قامتاماسىز ەتۋ ءۇشىن بالالاردى تاربيەلەۋ, وقىتۋ جانە تاماقتاندىرۋعا بولىنەتىن قاراجات كولەمى ءموبيلدى قوسىمشادا نەمەسە اتا-انالاردىڭ «الەۋمەتتىك ءاميانىندا» قىزمەتتى ناقتى الۋ فاكتىسىنە قاراي كورسەتىلىپ وتىرادى, – دەدى ۆيتسە-پرەمەر.
تامارا دۇيسەنوۆا مەكتەپكە دەيىنگى ءبىلىم بەرۋگە قاتىستى جوسپارلانىپ وتىرعان شارالار تۋرالى دا ايتتى. ونىڭ سوزىنشە, بالاباقشالاردىڭ ءبىلىم بەرۋ باعدارلامالارىن مەكتەپتەردىڭ باستاۋىش سىنىپتارىمەن سينحرونداۋ, بىرىڭعاي تسيفرلىق كەزەك جوباسىن ىسكە اسىرۋ جۇمىستارى جالعاسادى. بۇل جۇمىس زاڭناماعا وزگەرىستەر ەنگىزۋدى تالاپ ەتەدى. دەنەشىنىقتىرۋ جانە سپورت سالاسىندا دا جاڭالىقتار بار. اتاپ ايتقاندا, سپورتتى دامىتۋدىڭ ءۇش ساتىلى جۇيەسى قۇرىلادى. جوعارى جەتىستىكتەگى سپورت تۇرلەرىنىڭ تىزبەسى قايتا قارالادى. وسى سالاعا بولىنەتىن قاراجاتتى ءتيىمدى جانە ۇتىمدى پايدالانۋ ءۇشىن جان باسىنا شاققانداعى قارجىلاندىرۋ ءنورماتيۆى ەنگىزىلەدى, سپورت تۇرلەرى بويىنشا كادرلار دايارلاۋ جۇيەسى قايتا قارالادى. بۇل وزگەرىستەر ماجىلىستە قارالاتىن زاڭ جوباسى شەڭبەرىندە ەنگىزىلەدى.
دەنساۋلىق ساقتاۋ سالاسىندا دا رەفورمالار كوزدەلگەن. كەپىلدەندىرىلگەن بازالىق جانە ساقتاندىرۋ پاكەتتەرىنەن تۇراتىن مەديتسينالىق كومەكتىڭ بىرىڭعاي پاكەتىن قالىپتاستىرۋ ۇسىنىلادى. اشىقتىقتى قامتاماسىز ەتۋ ءۇشىن تسيفرلاندىرۋ ەنگىزىلەدى. جىل سوڭىنا دەيىن مەديتسينالىق ساقتاندىرۋ قورىن تسيفرلاندىرۋ بويىنشا جۇمىستاردى اياقتاۋ جانە كەلەسى جىلدىڭ سوڭىنا قاراي بىرىڭعاي ۇلتتىق اقپاراتتىق جۇيەنى ەنگىزۋ جوسپارلانىپ وتىر. ۇكىمەت وتباسىنىڭ تسيفرلىق كارتاسىنىڭ دەرەكتەرىنە سايكەس داعدارىستىق جانە شۇعىل ساناتتارعا جاتقىزىلعان وتباسىلار سانىن ازايتۋ جونىندەگى جۇمىستى جالعاستىرادى.