پرەمەر-مينيستر ولجاس بەكتەنوۆتىڭ توراعالىعىمەن وتكەن قر ۇكىمەتىنىڭ وتىرىسىندا مەملەكەت باسشىسىنىڭ بيىلعى 2 قىركۇيەكتەگى «ادىلەتتى قازاقستان: زاڭ مەن ءتارتىپ, ەكونوميكالىق ءوسىم, قوعامدىق وپتيميزم» اتتى قازاقستان حالقىنا جولداۋىن ىسكە اسىرۋ جونىندەگى جالپىۇلتتىق ءىس-شارالار جوسپارىنىڭ جوباسى قارالدى, دەپ حابارلايدى Egemen.kz.
قۇجاتتى پرەمەر-ءمينيستردىڭ ورىنباسارى – ۇلتتىق ەكونوميكا ءمينيسترى نۇرلان بايبازاروۆ ۇسىندى. جوسپار ەكونوميكانىڭ ورنىقتى ءوسۋىن قامتاماسىز ەتۋگە جانە ازاماتتاردىڭ الەۋمەتتىك جاعدايىن جاقسارتۋعا باعىتتالعان 76 ءىس-شارادان تۇرادى.
مەملەكەت باسشىسىنىڭ تاپسىرمالارىن ورىنداۋ ماقساتىندا ءبىلىم بەرۋ, دەنساۋلىق ساقتاۋ جانە سپورتتىڭ قولجەتىمدىلىگى مەن ساپاسىن ارتتىرۋ, ونىڭ ىشىندە قارجىلاندىرۋ رەفورماسى ماسەلەلەرى جونىندەگى شارالار كوزدەلگەن. اتالعان ماقساتتاردا ءمجا تەتىگىن, «الەۋمەتتىك ءاميان» قۇرالىن پايدالانۋ, ءبىلىم بەرۋ گرانتتارىن سارالاۋ جانە باسقا دا تەتىكتەردى قولدانۋ قاراستىرىلعان. «اقشا بالانىڭ سوڭىنان جۇرەدى» قاعيداتى بويىنشا مەملەكەتتىك تاپسىرىس شەڭبەرىندە مەكتەپكە دەيىنگى تاربيە مەن وقىتۋدى قارجىلاندىرۋدىڭ سارالانعان ءتاسىلى مودەلىنە ەرەكشە نازار اۋدارىلدى.
كەلەسى جىلى جۇمىسشى ماماندىقتارى جىلىن وتكىزۋ بويىنشا جەكەلەگەن ءىس-شارالار كوزدەلگەن. سونداي-اق ونەركاسىپ سالاسىندا وتاندىق شيكىزات پەن كومپونەنتتەردى بارىنشا پايدالانۋ, جۇيە قۇراۋشى كاسىپورىنداردىڭ اينالاسىندا ىلەسپە وندىرىستەر قۇرۋ جانە باسقالاردى ەسكەرە وتىرىپ, ءىرى جوبالار جۇزەگە اسىرىلادى. اوك جەلىسى جانە «اۋىل اماناتى» جوباسىن ىسكە اسىرۋ بويىنشا جەكەلەگەن شارالار قابىلداناتىن بولادى.
سونىمەن قاتار جوسپارعا ەنەرگەتيكا جانە كوممۋنالدىق شارۋاشىلىقتاعى ينفراقۇرىلىمدىق ماسەلەلەردى شەشۋ, تەمىرجول جۇك تاسىمالىنىڭ رەتتەلەتىن تاريفتەرىن الداعى 3 جىلدا رەنتابەلدىلىك دەڭگەيىنە دەيىن بەكىتۋ, سۋ قاۋىپسىزدىگىن قامتاماسىز ەتۋ, جي ەنگىزۋ جانە جولداۋدىڭ باسقا دا باعىتتارى قامتىلعان.
پرەمەر-مينيستر ولجاس بەكتەنوۆ ۇسىنىلعان جالپىۇلتتىق ءىس-شارالار جوسپارىنىڭ جوباسى مەملەكەت باسشىسى قويعان مىندەتتەردى ساپالى ءارى جەدەل شەشۋگە باعىتتالعانىن باسا ايتتى.
«باستى مىندەت – جوسپارداعى ءىس-شارالاردى ءتيىمدى جانە مەرزىمىندە ورىنداۋ. ۇكىمەت پەن اكىمدىكتەر ەكونوميكانىڭ ورنىقتى ءوسۋىن قامتاماسىز ەتۋ جانە ازاماتتارىمىزدىڭ الەۋمەتتىك جاعدايىن جاقسارتۋ باعىتىندا بەلسەندى شارالار قابىلدايتىن بولادى. جوسپاردا كورسەتىلگەن زاڭ جوبالارىن ۋاقتىلى ازىرلەۋ قاجەت. وعان ساراپشىلاردى تارتا وتىرىپ, تەرەڭ تالداۋ جانە تالقىلاۋ جۇرگىزۋ كەرەك», دەپ اتاپ ءوتتى ولجاس بەكتەنوۆ.
ۇكىمەت باسشىسى قارجىلاندىرۋ ماسەلەلەرىن جەتە پىسىقتاۋدى تاپسىردى. ارتىق شىعىنداردان باس تارتىپ, بيۋدجەت قاراجاتىن ءبىرىنشى كەزەكتەگى جانە ستراتەگيالىق ماقساتتارعا عانا باعىتتاۋ كەرەك.
ايتا كەتەرلىگى, ماسەلەنى قاراۋ قورىتىندىسى بويىنشا داۋىس بەرىلىپ, ناتيجەسىندە جالپىۇلتتىق جوسپار جوباسى ءبىراۋىزدان قولداۋ تاپتى. ۇلتتىق ەكونوميكا مينيسترلىگىنە ۇكىمەت اپپاراتىمەن بىرلەسىپ, مەملەكەت باسشىسىنىڭ ءتيىستى جارلىعىنىڭ جوباسىن پرەزيدەنت اكىمشىلىگىنە ەنگىزۋ تاپسىرىلدى.
پرەمەر-ءمينيستردىڭ ورىنباسارلارىنا جوسپار بويىنشا بەكىتىلگەن تارماقتاردىڭ ىسكە اسىرىلۋىن باقىلاۋ جانە ۇيلەستىرۋ مىندەتتەلدى.