تۇركىستان وبلىسىندا ماس كۇيدە كولىك تىزگىندەگەن ەر ادام 7 جىلعا كولىك باسقارۋ قۇقىعىنان ايرىلدى, دەپ حابارلايدى Egemen.kz Polisia.kz-كە سىلتەمە جاساپ.
ساۋران اۋدانىنىڭ پوليتسەيلەرى كۇندىزگى ۋاقىتتا اۋدان كوشەلەرىنىڭ بىرىنەن ءجۇرىسى كۇدىكتى ءارى قاۋىپسىزدىك بەلدىگىن تاقپاي كەلە جاتقان Daewoo Matiz اۆتوكولىگىنىڭ جۇرگىزۋشىسىن بايقاپ توقتاتقان.
تەكسەرۋ بارىسىندا 58 جاستاعى جەرگىلىكتى تۇرعىننىڭ ماس كۇيىندە كولىك جۇرگىزگەنى انىقتالعان. جۇرگىزۋشى زاڭ بۇزعانى ءۇشىن 15 تاۋلىككە قاماۋعا الىنىپ, 7 جىل مەرزىمگە كولىك باسقارۋ قۇقىعىنان ايرىلدى.