بۇگىن ماجىلىستە «AMANAT» پارتياسى فراكتسياسىنىڭ جيىنى ءوتتى, دەپ حابارلايدى Egemen.kz.
ءسوز باسىندا ءماجىلىس سپيكەرى, «AMANAT» پارتياسىنىڭ توراعاسى ەرلان قوشانوۆ دەپۋتاتتاردىڭ وڭىرلەرگە ساپارى كەزىندە جينالعان حالىقتىڭ بارلىق پروبلەمالىق ماسەلەسى جۇيەلەنىپ, ونى شەشۋ ءۇشىن ۇكىمەتكە جولداناتىنىن اتاپ ءوتتى. بۇل جۇمىستىڭ قورىتىندىسى جىل سوڭىندا ءماجىلىستىڭ جالپى وتىرىستارىنىڭ بىرىندە اشىق قارالادى.
وسى ورايدا, بىرقاتار دەپۋتات شىعىس قازاقستان, اقمولا, پاۆلودار, سولتۇستىك قازاقستان, اباي, جەتىسۋ وبلىستارى تۇرعىندارىن تولعاندىرعان ەڭ وزەكتى ماسەلەلەردىڭ قاتارىندا UTC+5 ۋاقىت فورماتىنا كوشۋ ەكەنىن اتاپ ءوتتى. كەزدەسۋلەر بارىسىندا ازاماتتار دەپۋتاتتارعا ءدال وسى ماسەلەگە بايلانىستى تۋىنداعان قولايسىزدىقتار تۋرالى كوپ دالەل كەلتىردى – ءتۇن ورتاسىندا تاڭ اتادى, ادەتتەگىدەن الدەقايدا ەرتە قاراڭعى تۇسەدى. مۇنىڭ ءبارى ادامداردىڭ كۇندەلىكتى ومىرىنە كەرى اسەر ەتەدى.
بۇعان قوسا, باستاماشىل ازاماتتار توبى وسى ماسەلە بويىنشا ءتيىستى پەتيتسيا جاريالاپ, ول قوعامدا قىزۋ تالقىعا ءتۇستى. جۋىردا وتكەن ءماجىلىستىڭ پلەنارلىق وتىرىسىندا بۇل ماسەلەنى «AMANAT» فراكتسياسىنىڭ مۇشەسى, شىعىس قازاقستان وبلىسىنان سايلانعان ءبىرمانداتتى دەپۋتات لۇقبەك تۋماشينوۆ كوتەردى. الايدا, ساۋدا جانە ينتەگراتسيا ءمينيسترىنىڭ اتالعان ماسەلە ءۇش جىلدان كەيىن قارالادى دەگەن جاۋابىن حالىق قالاۋلىلارى جەتكىلىكسىز دەپ تانىدى.
اتالعان ماسەلە بويىنشا دەپۋتاتتار لۇقبەك تۋماشينوۆ, رينات زايتوۆ, يۋليا كۋچينسكايا, داۋلەت مۇقاەۆ, نۇرتاي سابيليانوۆ, اسحات ايماعامبەتوۆ, دۇيسەنباي تۇرعانوۆ جانە وزگە دە ازاماتتار پىكىر ءبىلدىردى.
وسى تاقىرىپ توڭىرەگىندەگى قوعامدىق ۇلكەن رەزونانستى ەسكەرە وتىرىپ, تالقىلاۋ ناتيجەسىندە فراكتسيا دەپۋتاتتارى مۇددەلى مەملەكەتتىك ورگانداردىڭ, عالىمداردىڭ, ساراپشىلاردىڭ جانە وڭىرلەردەگى وكىلدەردىڭ قاتىسۋىمەن الداعى ۋاقىتتا وتەتىن ءماجىلىستىڭ جالپى وتىرىستارىنىڭ بىرىندە ۋاقىت بەلدەۋىن اۋىستىرۋ ماسەلەسىن اشىق قاراۋ تۋرالى شەشىم قابىلدادى. وتىرىس قورىتىندىسى بويىنشا ناقتى ۇسىنىستار ازىرلەنىپ, ونى ۇكىمەتكە ۇسىنۋ جوسپارعا الىنعان.