اتباسارداعى اعايىننىڭ كوبى ءناسىبىن تەمىرجولدان تاپقان. وسى سالاعا قاتىستى ءىرى كاسىپورىندار اۋدان ازاماتتارىن جۇمىسپەن قامتىپ وتىر. وتكەن اپتادا بۇل قاتارعا تاعى ءبىر ءوندىرىس وشاعى قوسىلدى. لوكوموتيۆ قۇراستىرۋ زاۋىتىنىڭ كاپسۋلاسىن سالۋ راسىمىنە كۋا بولىپ قايتتىق.
جاڭا ينۆەستيتسيالىق جوبانىڭ ىرگەتاسى قالانعان يىگىلىكتى شاراعا اقمولا وبلىسىنىڭ اكىمى مارات احمەتجانوۆ, كولىك ۆيتسە-ءمينيسترى ماقسات قالياقپاروۆ, «قازاقستان تەمىر جولى» اق توراعاسىنىڭ ورىنباسارى تالعات الدابەرگەنوۆ قاتىستى.
ەلىمىز ءۇشىن ماشينا جاساۋ – يندۋستريالاندىرۋدىڭ نەگىزگى دىڭگەگى. ويتكەنى ەكونوميكانىڭ وزگە باعىتتارى ءدال وسى سالاعا تاۋەلدى. ماشينا جاساۋ اگروونەركاسىپ, ەنەرگەتيكا, مەتاللۋرگيا, كولىك سەكىلدى ىرگەلى سەكتورلاردىڭ جۇمىسىن جانداندىرىپ وتىر. تەمىرجول – وسى سالانىڭ ۇلكەن ءبىر بولىگى.
ايماق باسشىسى مارات احمەتجانوۆتىڭ ايتۋىنا قاراعاندا, جاڭا جوبا تەك وسى سالانى عانا ەمەس, بۇكىل ءوڭىردى دامىتاتىن ۇلكەن قوزعاۋشى كۇش بولماق.
«مەن ءۇشىن بۇگىن وبلىس اۋماعىندا لوكوموتيۆتەردى قۇراستىرۋ بويىنشا تاريحى مول تەمىرجول تورابى سانالاتىن اتباسار قالاسىندا زاماناۋي زاۋىتتىڭ قۇرىلىسىن باستاۋ – ۇلكەن مارتەبە. مەملەكەت باسشىسىنىڭ ەلدىڭ بەرىك ونەركاسىپتىك قاڭقاسىن قالىپتاستىرۋ, ەكونوميكالىق ءوزىن-ءوزى قامتاماسىز ەتۋ جونىندەگى العا قويعان مىندەتى شەڭبەرىندە «قامقور لوكوموتيۆ» جوباسى ءوز جۇمىسىن ىستەپ تۇر. بۇل – وڭىردەگى ءىرى جوبالاردىڭ ءبىرى. جوبانى جۇزەگە اسىرۋ ءوڭىردىڭ الەۋمەتتىك-ەكونوميكالىق دامۋىنا, سونداي-اق حالىقتىڭ جۇمىسپەن قامتىلۋى مەن تابىسىنا وڭ اسەر ەتەدى», دەدى وبلىس اكىمى.
اتباسار لوكوموتيۆ قۇراستىرۋ زاۋىتى الدا ماگيسترالدىق ەلەكتروۆوزداردىڭ 100 سەكتسياسىن, ماگيسترالدىق ەلەكتروۆوزداردىڭ 200 سەكتسياسىن, مانەۆرلىك تەپلوۆوزداردىڭ 60 سەكتسياسىن شىعارماق.
ء«بىرىنشى كەزەڭ شامامەن 3-4 جىلعا سوزىلادى. باستاپقى كەزەڭدە 80 ادام جۇمىس ىستەيدى. ولار, نەگىزىنەن جوبالاۋشىلار. بىرتە-بىرتە كادرلىق الەۋەت 800 ادامعا دەيىن جەتكىزىلەدى. بولاشاقتا لوكوموتيۆ ەلەمەنتتەرىن وقشاۋلاۋ, دايىنداۋ جوسپارلانىپ وتىر. زاۋىتتىڭ الاڭى جۇمىس ىستەپ تۇرعان ۆاگون جوندەۋ زاۋىتىنىڭ جانىندا ارنايى تاڭدالعان», دەدى جاڭا زاۋىتتىڭ ديرەكتورى جاناتبەك ادامباەۆ.
سۋرەتتەردى تۇسىرگەن – ەرلان ومار, «EQ»
زاۋىتتىڭ قۇرىلىسى كەلەسى جىلى باستالىپ, 2026 جىلى اياقتالماق. العاشقى لوكوموتيۆ 2027 جىلى شىعارىلماق. جەكە ينۆەستيتسيالىق جوبانىڭ قۇنى – شامامەن 47 ملرد تەڭگە. بۇل جوبالاردىڭ بارلىعى اۋدان, وبلىس ەكونوميكاسىن دامىتۋعا ۇلكەن سەپتىگىن تيگىزىپ, جاڭا جۇمىس ورىندارى پايدا بولماق.
«كاسىپورىن اتباسار ەلەكتروۆوز جوندەۋ زاۋىتى جانىنان سالىنادى. وندا بىلىكتى ماماندار بار. قالانىڭ دا الەۋەتى ۇلكەن. وتاندىق ونىمدەردى دە قولدانامىز. لوكوموتيۆكە شامامەن 20 شاقىرىم سىم قاجەت. زاۋىتتىڭ جۇمىسى – لوكوموتيۆتى دايىنداۋ, ءىرى بولشەكتەردى جيناۋ, بوياۋ, سىناقتان وتكىزۋ, تاپسىرىس بەرۋشىگە جەتكىزۋ», دەيدى زاۋىت ديرەكتورى.
وسى ورايدا اۋداندى العا جەتەلەپ وتىرعان كاسىپورىنداردى دا ايتپاي كەتۋگە بولماس. اتباسار ەلەكتروۆوز جوندەۋ زاۋىتى, «اجدار جانە ك» ۆاگون جوندەۋ كاسىپورنى, «Atbasartehnopark» سەرۆيستىك سەرىكتەستىگىنىڭ ورنى بولەك. «اجدار ي ك» جشس-نا قاراستى كاسىپورىن جۇك ۆاگوندارىنىڭ بارلىق ءتۇرىن ساپالى جوندەپ قانا قويماي, قاجەتتى بولشەكتەردى دە شىعارا الادى. بۇعان قوسا اۋدان تۇرعىندارىن سىعىمدالعان وتتەگى تولتىرىلعان باللوندارمەن دە قامتاماسىز ەتىپ وتىر. جاڭا تەحنولوگياعا يەك ارتقان زاۋىت جۇمىس ونىمدىلىگىن جىل سايىن ارتتىرىپ كەلەدى. كاسىپورىن قىزمەتكەرلەرىنىڭ ايتۋىنشا, ۋاقىت تالابىنا ساي بولۋ ءۇشىن سالاعا سەرپىن بەرەتىن تىڭ جاڭالىقتاردان تىس قالماۋ كەرەك. ول ءۇشىن الداعى ۋاقىتتا مۇندا ۆاگونداردى جوندەۋدىڭ تولىق اينالىمىن جۇزەگە اسىرۋ جوسپارلانىپ وتىر.
قازىر دەپودا ءار اۋىسىم سايىن 7 جۇك ۆاگونىنا جوسپارلى جوندەۋ جۇرگىزسە, 4-5 ۆاگون كۇردەلى جوندەۋدەن وتكىزىلەدى ەكەن. 220 ادام ەڭبەك ەتەدى. بيىل ماۋسىم ايىندا ورتاشا ەڭبەكاقى كولەمى 390 مىڭ تەڭگەگە جەتىپتى. اتباسار ءتارىزدى شاعىن قالا ءۇشىن ءتاپ-ءتاۋىر كورسەتكىش ەكەنى انىق. ال جاڭادان سالىناتىن لوكوموتيۆ قۇراستىرۋ زاۋىتى ءدال وسىلاي ەل يگىلىگىنە جاراپ, وڭىردەگى جۇمىسسىزدىق ماسەلەسىن جەڭىلدەتە تۇسەرى ءسوزسىز.