«ەڭبەك رەسۋرستارىن دامىتۋ ورتالىعى» اق «مانساپ كومپاسى» اتتى جاڭا پلاتفورمانى ىسكە قوستى, دەپ حابارلايدى Egemen.kz قر ەڭبەك جانە حالىقتى الەۋمەتتىك قورعاۋ مينيسترلىگىنىڭ ءباسپاسوز قىزمەتىنە سىلتەمە جاساپ.
مينيسترلىكتىڭ حابارلاۋىنشا, تسيفرلىق شەشىم پايدالانۋشىلارعا ەڭبەك نارىعىنداعى وزەكتى ترەندتەردى زەردەلەۋگە, ءارتۇرلى كاسىپتەردىڭ سۇرانىسىن سالىستىرۋعا جانە وڭتايلى ءبىلىم بەرۋ تراەكتورياسىن تاڭداۋعا بىرەگەي مۇمكىندىك بەرەدى.
«پلاتفورما 2019 جىلدان باستاپ وتاندىق ەڭبەك نارىعى تۋرالى دەرەكتەردى تالدايدى, بۇل پايدالانۋشىلارعا وزگەرىستەر ديناميكاسىن باعالاۋعا جانە بولاشاق ۇردىستەردى بولجاۋعا مۇمكىندىك بەرەدى. جوبانىڭ ءبىر ەرەكشەلىگى – جۇمىس ىزدەۋدىڭ بارلىق نەگىزگى پلاتفورمالارىن تالداۋ. بۇل پايدالانۋشىلارعا ەڭ كوپ سۇرانىسقا يە كاسىپتەردى باعدارلاۋعا جانە ەڭ جاقسى ەڭبەك جاعدايلارى بار ايماقتاردى تاڭداۋعا مۇمكىندىك بەرەدى. سونىمەن بىرگە پلاتفورما جوعارى وقۋ ورىندارى, ماماندىقتار جانە مەملەكەتتىك گرانتتار الۋ مۇمكىندىكتەرى تۋرالى تولىق مالىمەت بەرەدى», دەلىنگەن حابارلامادا.
ايتا كەتەيىك, جوبانى باستاۋ ءۇشىن جوعارى ءبىلىم الۋدى تالاپ ەتەتىن 300-دەن استام كەڭ تارالعان ماماندىقتارعا تەرەڭ تالداۋ جۇرگىزىلگەن. كەلەسى كەزەڭدەردە وسىنداي جۇمىس نەگىزگى تەحنيكالىق جانە جۇمىسشى ماماندىقتار بويىنشا, سونداي-اق قوسىمشا ءبىلىم بەرۋ سالاسىندا جۇرگىزىلمەك. سونداي-اق 2024 جىلدىڭ سوڭىنا قاراي ماماندىقتار تۋرالى دەرەكتەردى دالىرەك بولجاۋ جانە تالداۋ ءۇشىن ماشينالىق وقىتۋ مودەلدەرىن ەنگىزۋ جوسپارلانعان.
سونىمەن قاتار پورتالدا كاسىپتەر, ءبىلىم بەرۋ باعدارلامالارى مەن جۇمىس ورىندارى تۋرالى اقپاراتتى ساقتاۋعا ارنالعان مالىمەتتەر بازاسى, سونداي-اق پايدالانۋشىلاردىڭ داعدىلارىن باعالاۋ جانە جاقسارتۋ قۇرالدارى سەكىلدى جاڭا فۋنكتسيونال پايدا بولادى.
- «مانساپ كومپاسى» جوباسىنىڭ اۋديتورياسى ءوز مانسابىن جوسپارلاۋعا جانە كاسىبي دامۋعا مۇددەلى ادامداردىڭ ءارتۇرلى ساناتتارىن قامتيدى. ءبىرىنشى كەزەڭدە – مەكتەپ تۇلەكتەرى مەن ستۋدەنتتەر. ولار ءۇشىن پلاتفورما سۇرانىسقا يە ماماندىقتار, جوعارى وقۋ ورىندارىنا تۇسۋشىلەرگە قويىلاتىن تالاپتار جانە گرانتتار الۋ مۇمكىندىكتەرى تۋرالى اقپارات كوزى بولا الادى, سونداي-اق تاڭدالعان ماماندىقتىڭ بولاشاعىن باعالاۋ, تاعىلىمدامادان ءوتۋ جانە بولاشاق جۇمىستى ىزدەۋ ءۇشىن بىرەگەي اقپارات بەرەدى, – دەپ اتاپ ءوتتى ەردو ۆيتسە-پرەزيدەنتى شالقار بايقۇلاقوۆ.
پورتال ماماندىعىن وزگەرتكىسى كەلەتىن ادامدار ءۇشىن دە پايدالى بولماقشى. دەمەك,ء وز داعدىلارىن تالداۋعا, جاڭا كاسىبي ماقساتتاردى انىقتاۋعا جانە ءتيىستى ءبىلىم بەرۋ باعدارلامالارىن تابۋعا مۇمكىندىك تۋىپ وتىر.