جاڭا وقۋ جىلى قارساڭىندا جاز بويى جايما-شۋاق جاتقان شاھاردا ابىر-سابىر تىرشىلىك باستالادى. ويتكەنى قازداي ءتىزىلىپ, مەكتەپكە بەت العان وقۋشىلار مەن توپتاسقان ستۋدەنتتەر تاعى ءبىر وقۋ جىلىنىڭ باستاۋ العانىن بىلدىرەدى. وسىنداي ساتتە ءبىر ءۇيدىڭ ءۇمىتىن ارقالاپ, قالاعا جەتكەن جاستاردى ويلاندىراتىن باستى ماسەلە – جاتاقحانا ەكەنى راس.
وسىعان بايلانىستى وڭىردەگى وقۋ ورىندارىنىڭ جاعدايىن سارالاپ كوردىك. سىر ءبىلىمىنىڭ قارا شاڭىراعى سانالاتىن قورقىت اتا اتىنداعى قىزىلوردا ۋنيۆەرسيتەتىندە بۇل ماسەلە تولىق شەشىمىن تاپقان. وسى كۇنى ۋنيۆەرسيتەت بالانسىندا 780 ورىنعا ارنالعان 4 ستۋدەنتتىك جاتاقحانا بار. سونىمەن قاتار ارىپتەستىك كەلىسىمشارت نەگىزىندە «قارجى ورتالىعى» اق قارجىلاندىرىلاتىن «وركەنيەت», «ديلماش», «ينكار 7» جشس جاتاقحانالارىنان 680 ورىن پايدالانۋعا بەرىلەدى.
«وسىلايشا, قازىر وقۋ ورنى جاتاقحانادان ستۋدەنتتەرگە 1 460 ورىن ۇسىنىپ وتىر. بۇگىنگە دەيىن 1027 ستۋدەنت جاتاقحاناعا جولداما الدى. سونىمەن قاتار 25 قانداس ۋنيۆەرسيتەتتىڭ ءبىلىم گرانتىمەن, شەت مەملەكەتتەن كەلگەن تاعى دا 15 جاس ارنايى دايارلىق كۋرسىندا ءبىلىم الادى. بۇلاردىڭ ءبارى جاتاقحانامەن تولىق قامتىلادى», دەيدى ۋنيۆەرسيتەتتەگى ءباسپاسوز قىزمەتىنىڭ ماماندارى.
ستۋدەنتتەردى جايلى جاتاقحانامەن قامتىپ وتىرعان وقۋ ورنىنىڭ ءبىرى – «بولاشاق» ۋنيۆەرسيتەتى. ۋنيۆەرسيتەت اباي كوشەسىنىڭ بويىنداعى بۇرىنعى عيمارات ىرگەسىنەن ءزاۋلىم جاتاقحانا سالىپ, ءبىلىم الۋشىلارعا بارىنشا جاعداي جاساعان ەدى. قالانىڭ سول جاعالاۋىنان بوي كوتەرگەن قازىرگى كامپۋس قۇرامىندا دا 2 بىردەي جاتاقحانا تۇر. ءبىرى – 111, ەكىنشىسى – 92 ورىندىق 5 قاباتتى قوس عيمارات, ىشىندە وقۋ زالى, دەمالىس بولمەسى, سپورتتىق جاتتىعۋ زالى مەن مەدپۋنكت, ستۋدەنتتەر كەڭەسىنە ارنالعان بولمەلەرى بار.
م.مامەتوۆا اتىنداعى قىزىلوردا پەداگوگيكالىق جوعارى كوللەدجى دە – وسى سالاعا تالاي مىڭداعان مامان دايارلاعان بايىرعى وقۋ ورنىنىڭ ءبىرى. كوللەدج ديرەكتورى جاقسىگۇل توعانوۆانىڭ ايتۋىنشا, وقۋ ورنىندا 248 ورىنعا ارنالعان جاتاقحانا بار.
وسىدان 5 جىل بۇرىن قىزىلوردا مەديتسينالىق جوعارى كوللەدجى ستۋدەنتتەرى ءۇشىن 330 ورىندىق جاڭا جاتاقحانا سالىنىپ, پايدالانۋعا بەرىلگەن. دەمالىس ورنىمەن قاتار مەديتسينالىق پۋنكت, وقۋ زالى بار جاتاقحانا توڭازىتقىش, قىسقاتولقىندى پەش, كىر ماشيناسى سەكىلدى تۇرمىستىق تەحنيكالارمەن قامتىلعان. جاتاقحانادا مادەني ءىس-شارا جۇيەلى ءوتىپ تۇرادى. «Orda» جوعارى كوللەدجىندەگى 100 ورىنعا ارنالعان جاتاقحانادا دا الىس اۋدانداردان كەلگەن ستۋدەنتتەرگە بارلىق جاعداي جاسالعان.
بىلتىر وبلىستاعى ءبىلىم جۇيەسىن دامىتۋدىڭ وڭىرلىك جول كارتاسى قابىلدانعان. وقۋ-اعارتۋ مينيسترلىگى مەن جەرگىلىكتى اكىمدىك بىرلەسىپ جۇزەگە اسىراتىن جول كارتاسىندا 8 باعىت بويىنشا 107 ءىس-شارا جوسپارلانىپتى. 2023-2029 جىلدار ارالىعىن قامتيتىن قۇجاتقا قول قويۋ بارىسىندا وبلىستا ستۋدەنتتەر ءۇشىن 2 جاتاقحانا بوي كوتەرەتىنى دە ايتىلدى.
جالپى, ءبىلىم سالاسىنداعى اۋقىمدى جوبالاردى جۇزەگە اسىرۋعا جەكەلەگەن كومپانيالار قوسقان ۇلەس مول. كەيىنگى 10 جىلدا مۇناي كومپانيالارى ءوڭىردىڭ الەۋمەتتىك-ەكونوميكالىق دامۋىنا 16 ملرد 600 ملن تەڭگەدەن استام قارجى اۋدارىپتى. بۇگىندە «قازگەرمۇناي» كومپانياسى 2 ملرد 350 ملن تەڭگەگە 350 ورىندىق زاماناۋي ۇلگىدەگى وقۋشىلار سارايىن سالىپ جاتىر. «ساۋتس ويل» كومپانياسىنىڭ دەمەۋشىلىگىمەن قالانىڭ سول جاعالاۋىنان مۋزىكالىق كوللەدجدىڭ قۇنى 4 ملرد 800 ملن تەڭگە بولاتىن 650 ورىندىق جاڭا عيمارات قۇرىلىسى دا بوي كوتەرىپ كەلەدى.
قىزىلوردا