30 تامىزدا اقتوبە وبلىسىنىڭ قوبدا اۋدانىندا سۋ تاسقىنىنان زارداپ شەككەن 117 وتباسىعا جاڭا ءۇيدىڭ كىلتى تابىستالدى. قوبدا اۋىلىندا 100 ءۇي, ودان بولەك جارىق اۋىلىندا تاعى 17 ءۇي بوي كوتەردى, ولاردىڭ بارلىعى دا بولات وتەمۇراتوۆ قورىنىڭ قولداۋىمەن سالىندى, دەپ حابارلايدى Egemen.kz
وبلىس اكىمدىگىنىڭ حابارلاۋىنشا, اۋماعى 80 شارشى مەتردى قۇرايتىن ءار ءۇي اۆتونومدى جىلىتۋعا ارنالعان سانيتارلىق توراپتار مەن قازاندىقتاردى قوسا العاندا, زاماناۋي قوندىرعىلارمەن جابدىقتالعان. جاڭا قونىس يەلەرىنە كىلت تاپسىرعان اقتوبە وبلىسىنىڭ اكىمى اسحات شاحاروۆ اپاتتان زارداپ شەككەن تۇرعىندارعا مەملەكەت پەن جەكە كاسىپكەرلەردەن كومەك ۋاقىتىلى بەرىلگەنىن اتاپ ءوتتى.
ء«بىز تاسقىن سۋدان كەيىن باسىمىزعا تۇسكەن قيىندىققا بەي-جاي قاراماعان كاسىپكەرلەرگە وبلىسىمىزدى قالپىنا كەلتىرۋگە قوسقان ۇلەستەرى ءۇشىن العىس بىلدىرەمىز. بولات وتەمۇراتوۆ قورىنىڭ دەمەۋشىلىگىمەن زارداپ شەككەندەردى تۇرعىن ۇيمەن قامتاماسىز ەتۋ بويىنشا اتقارىلعان جۇمىستار قيىن كەزەڭدەردە بىرىگۋدىڭ قانشالىقتى ماڭىزدى ەكەنىن كورسەتتى. قالىپتى ومىرگە ورالعان جاڭا قونىس يەلەرىنىڭ قۋانىشى ءبىزدىڭ ءوڭىرىمىزدىڭ يگىلىگى ءۇشىن ءارى قاراي ىنتىماقتاستىقتا جۇمىس ىستەۋگە جىگەرلەندىرەدى», دەپ اتاپ ءوتتى اسحات شاحاروۆ.
جاڭا باسپانا كىلتىن العانداردىڭ كوپشىلىگى ۋاقىتشا تۋىستارىنىڭ ۇيىندە نەمەسە پاتەر جالداپ كەلگەن.
«سۋ تاسقىنى كەزىندە ءۇيدىڭ ىشىنە كىرگەن سۋ 20 سانتيمەترگە دەيىن كوتەرىلدى, ءبىز قولىمىزدا بار دۇنيەمىزدى ء بىر ساتتە جوعالتتىق. مەتسەناتتار مەن مەملەكەتتىڭ قولداۋىنىڭ ارقاسىندا جاڭا ۇيگە كىرىپ جاتىرمىز, جاڭا ءۇمىت پايدا بولدى. كورسەتىلگەن كومەككە وتە ريزامىز. بىزگە ءۇي ۇنادى, قۇرىلىس پروتسەسىن باقىلاپ, باسى-قاسىندا بولدىق. ۇيىمىزدە جىلىتۋ جانە سانيتارلىق توراپتاردى قوسا العاندا, جايلى ءومىر ءسۇرۋ ءۇشىن ءبارى بار», دەدى قوبدا اۋدانىنىڭ تۇرعىنى جادىرا اياپبەرگەنوۆا.
قور ديرەكتورى مارات ايتماعامبەتوۆ زارداپ شەككەن وتباسىلاردى قولداۋدىڭ قانشالىقتى ماڭىزدى ەكەنىن اتاپ ءوتتى.
ء«بىز ارقاشان قيىن ساتتەردە ادامدارعا قولداۋ كورسەتۋگە تىرىسامىز. باسپاناسىز قالۋ - كەز كەلگەن ادام ءۇشىن اۋىر سىناق. ءبىزدىڭ مىندەتىمىز جايلى جانە ساپالى ۇيلەردى ۋاقىتىلى سالۋ عانا ەمەس, سونىمەن قاتار ادامداردىڭ قالىپتى ومىرگە ورالۋىنا, بولاشاققا دەگەن سەنىمدىلىكتى قالپىنا كەلتىرۋىنە كومەكتەسۋ بولدى», دەدى ول.
ايتا كەتەيىك, جاقىن كۇندەرى قور تاعى دا اۋدانداعى 30 ءۇيدىڭ كىلتىن تابىستايدى, بۇل اقتوبە وبلىسىندا 400-دەن استام وتباسىن تۇرعىن ۇيمەن قامتاماسىز ەتۋ بويىنشا اۋقىمدى جوبانى تولىعىمەن اياقتاۋعا مۇمكىندىك بەرەدى. بۇعان دەيىن ءوڭىر تۇرعىندارىنا اقتوبە قالاسىنان 106 پاتەر جانە وبلىستىڭ ءتۇرلى اۋداندارىنان 162 ءۇي بەرىلگەن.
جالپى العاندا, بولات وتەمۇراتوۆ قورىنىڭ كومپانيالار توبى قازاقستانداعى سۋ تاسقىنىنان زارداپ شەككەندەرگە كومەك رەتىندە شامامەن 12,5 ملرد تەڭگە بولگەن. ونىڭ 10 ملرد تەڭگەدەن استامىن قايىرىمدىلىق قورى بەرگەن, ال «كار-تەل» جانە RG Gold كومپانيالارى ارقايسىسى 1 ملرد تەڭگەدەن ۇلەس قوسقان.