جەلىدە استانا اۋەجايىندا جولاۋشىدان مايمىل شەشەگى انىقتالدى دەگەن اقپارات تارادى. سانيتاريالىق-ەپيدەميولوگيالىق باقىلاۋ كوميتەتى اتالعان اقپاراتقا قاتىستى پىكىر ءبىلدىردى,دەپ حابارلايدى Egemen.kz.
جالعان اقپاراتتى تاراتۋشىلار مايمىل شەشەگىنىڭ ەلگە ەنۋىنە قارسى دايىندىق بويىنشا وتكىزىلگەن ۆەدومستۆوارالىق وقۋ-جاتتىعۋ بارىسىندا تۇسىرىلگەن بەينەماتەريالدى قولدانعان.
سانيتاريالىق-ەپيدەميولوگيالىق باقىلاۋ كوميتەتى قازاقستاندا مايمىل شەشەگى اۋرۋىنىڭ بىردە-ءبىر جاعدايى, سونداي-اق سىرتتان اكەلىنگەن جۇقپالى جاعدايلاردىڭ تىركەلمەگەندىگىن حابارلادى.
ايتا كەتەيىك, مايمىل شەشەگىنىڭ ەلىمىزگە ەنۋىنىڭ الدىن الۋ ماقساتىندا وتكىزۋ پۋنكتتەرىندە سانيتاريالىق-كارانتيندىك باقىلاۋ كۇشەيتىلدى.
جالعان اقپارات تاراتقان ادامداردىڭ ارەكەتتەرىنە قۇقىقتىق باعا بەرۋ ءۇشىن ماتەريالدار قۇقىق قورعاۋ ورگاندارىنا جولداندى.