ازاماتتىق بەلسەندىلىكتىڭ ايناcى

ماڭعىستاۋ وبلىسىنا ەل پرەزيدەنتىنىڭ كەزەكتەن تىس سايلاۋىنىڭ ءوتۋ بارىسىن سىرتتاي قاراپ, بايقاۋ ءۇشىن كەلگەن قوناقتاردىڭ اراسىندا الەۋمەتتىك زەرتتەۋ جۇرگىزۋشىلەر دە بار. ءبىز الەۋمەتتىك-ساياسي زەرتتەۋلەر ينستيتۋتىنىڭ مەنەدجەرى مەرۋەرت نۋگيەۆانى سوزگە تارتقان ەدىك. – مەرۋەرت الىبەگقىزى, ماڭعىستاۋ وڭىرىنە قوش كەلدىڭىز! سايلاۋ بارىسىندا جۇرگىزەتىن زەرتتەۋلەرىڭىزدىڭ ءمانى قانداي؟ – راحمەت. ءبىزدىڭ الەۋمەتتىك-ساياسي زەرتتەۋلەر ينستيتۋتى قازاقستان رەسپۋبليكاسى پرەزيدەنتىنىڭ كەزەكتەن تىس سايلاۋى كەزىندە EXIT POLL الەۋمەتتىك زەرتتەۋ جۇرگىزۋدە. EXIT POLL – سايلاۋ ۋچاسكەلەرىنەن شىققاننان كەيىن جۇرگىزىلەتىن الەۋمەتتىك زەرتتەۋ. ياعني, زەرتتەۋ ادىستەمەسى سايلاۋ ۋچاسكەلەرىنەن شىققاننان كەيىن قويىلاتىن سۇراقتاردان تۇرادى. بۇگىندە اتالمىش زەرتتەۋ بۇگىن ەلىمىزدىڭ بارلىق وڭىرلەرىندە ءجۇرىپ جاتىر, ءبىزدىڭ ينستيتۋتتىڭ وكىلدەرى بارلىق ايماقتاردا جۇمىس ىستەۋدە. زەرتتەۋ كەزىندە تەك «سايلاۋ كەزىندە قاي ۇمىتكەرگە داۋىس بەردىڭىز؟» دەگەن ءبىر عانا سۇراق بەرەمىز. ارينە, سۇراققا جاۋاپ بەرۋ ادامداردىڭ ءوز ەركىندە. ءبىز سۇراقتى تەك قانا جاۋاپ بەرۋگە رۇقسات بەرگەندەردەن سۇرايمىز. ءبىز وسى سۇراققا جاۋاپ الۋ ارقىلى, الەۋمەتتىك باعىتتا زەرتتەۋ مالىمەتتەرىنە قول جەتكىزەمىز. – سايلاۋ ۋچاسكەلەرىندە بولدىڭىز. داۋىس بەرۋ قالاي ءوتتى؟ – سايلاۋ بارىسىنان جوعارى كاسىبي ۇيىمداستىرۋشىلىق بايقالدى. كانديداتقا ادام تارتۋ نەمەسە ناسيحات جۇرگىزۋ, باسقا دا سايلاۋ كەزىندە بولۋى مۇمكىن زاڭ بۇزۋشىلىقتار بولعان جوق. – سايلاۋشىلاردىڭ اتسالىسۋىن قالاي باعالار ەدىڭىز؟ – داۋىس بەرۋ – ول كوزدى جۇمىپ قارايتىن جەڭىل نارسە ەمەس. ونىڭ ارتىندا ەل تاعدىرى, مەملەكەت بولاشاعى تۇر. سوندىقتان, وعان تۇرعىنداردىڭ كوپتەپ كەلۋىن وزدەرىنىڭ وسى ازاماتتىق جاۋاپكەرشىلىگىن سەزىنگەندىگى, ازاماتتىق بەلسەندىلىگىنىڭ وسكەن­دىگى دەپ ايتا الامىن. كامەلەتتىك جاسقا تولعان جاس پەن ەڭكەيگەن قارتقا دەيىن سايلاۋ ورىندارىنان تابىلىپ, ءوز داۋىسى بەلگىلەنگەن بيۋللەتەندەردى ءتيىستى جاشىككە سالىپ جاتقانىن كورىپ, ءار بۋىن وكىلدەرىنىڭ ەل ەرتەڭىنە بەيجاي قارامايتىندىعىن, ءوز داۋىستارىنىڭ ماڭىزعا يە ەكەندىگىن ۇعاتىندىعىن ءبىلدىم. ماڭعىستاۋدا سايلاۋ­ ۇيىم­داستىرىلۋى جاعى­نان جوعارى بولسا, ونى ماڭعىستاۋلىقتاردىڭ بەلسەندىلىگى تولىقتىرىپ, ساي­لاۋعا ۇلكەن ەكپىن, ەرەكشە ءسان بەرگەندەي بولدى. – راحمەت. اڭگىمەلەسكەن گۇلايىم شىنتەمىرقىزى,  «ەگەمەن قازاقستان».   ماڭعىستاۋ وبلىسى.