2025 جىلى الەۋمەتتىك سالاعا 9,8 ترلن تەڭگە باعىتتالادى. بۇل تۋرالى قارجى ءمينيسترى ءمادي تاكيەۆ ۇكىمەت وتىرىسىندا ايتتى, دەپ حابارلايدى Egemen.kz.
«بيۋدجەت شىعىستارى 2025 جىلعا ارنالعان كىرىستەر مەن تاپشىلىقتى ەسكەرە وتىرىپ, 2024 جىلعا قاراعاندا 1,7 ترلن تەڭگەگە ۇلعايىپ, 25,8 ترلن تەڭگەنى قۇرايدى. بيۋدجەت الەۋمەتتىك باعىتقا باعدارلانعان بولىپ قالا بەرەدى. 2025 جىلى الەۋمەتتىك سالاعا 2024 جىلمەن سالىستىرعاندا 794 ملرد تەڭگەگە ۇلعايىپ 9,8 ترلن تەڭگە باعىتتالادى», دەدى مينيستر.
سونىمەن قاتار 2024 جىلمەن سالىستىرعاندا گرانتتار سانى 2 500 ورىنعا ۇلعايتىلادى.
«2025 جىلى شامامەن 78 مىڭ ءبىلىم بەرۋ گرانتى بولىنەدى. جوعارعى وقۋ ورىندارىنىڭ ستۋدەنتتەرىنە ستيپەنديا مولشەرىن ورتا ەسەپپەن 15-20%-عا ۇلعايتۋ جوسپارلانىپ وتىر», دەدى قارجى ءمينيسترى.
ناتيجەسىندە ستيپەنديانىڭ ورتاشا مولشەرى باكالاۆريات ستۋدەنتتەرى ءۇشىن 52 372 تەڭگەنى, ماگيستراتۋرا ءۇشىن 117 098 تەڭگەنى قۇرايدى.