بۇگىن ءماجىلىس سپيكەرى, «AMANAT» پارتياسىنىڭ توراعاسى ەرلان قوشانوۆ «جاستار رۋحى» رەسپۋبليكالىق جاستار ساياسي لاگەرىنىڭ جۇمىسىنا قاتىستى. تۇركىستان وبلىسى نىسانبەك اۋىلىندا قازاقستاننىڭ تۇكپىر-تۇكپىرىنەن كەلگەن 420 دەلەگات باس قوستى, دەپ حابارلايدى Egemen.ءkz ماجىلىستىڭ ءباسپاسوز قىزمەتىنە سىلتەمە جاساپ.
ءماجىلىس سپيكەرى جاستار ۇنەمى جاڭا ۇردىستەردىڭ باسى-قاسىندا جۇرەتىنىن جانە مەملەكەتىمىزدىڭ قوزعاۋشى كۇشى بولا وتىرىپ, ادىلەتتى قازاقستاننىڭ بولاشاعى سانالاتىنىن اتاپ ءوتتى. ول بۇگىندە مەملەكەت جاستاردىڭ الەۋمەتتىك ماسەلەلەرىن شەشۋ باعىتىندا اۋقىمدى جۇمىس اتقارىپ جاتقانىنا توقتالدى. سونداي-اق پارتيا توراعاسى «جاستار رۋحى» ۆولونتەرلىك قىزمەتىنىڭ تيىمدىلىگىنە نازار اۋداردى.
ءىس-شاراعا قاتىسۋشىلار قازاقستاندا اەس سالۋ ماسەلەسىن جەكە تالقىلادى. «جاستار رۋحىنىڭ» بەلسەندىلەرى مەن مۇشەلەرى بۇل باستامانىڭ ماڭىزىن اتاپ ءوتىپ, اەس قۇرىلىسىنا قولداۋ ءبىلدىردى.
ءماجىلىس توراعاسى اەس توڭىرەگىندە ءجۇرىپ جاتقان اۋقىمدى پىكىرتالاسقا جاستار بەلسەندى قاتىسىپ, وزدەرىنىڭ ازاماتتىق ۇستانىمدارىن باتىل ءبىلدىرۋى كەرەك ەكەنىن اتاپ ءوتتى.
– پرەزيدەنتىمىز ايتقانداي, ەلىمىز ءۇشىن ەڭ ماڭىزدى شەشىمدەر تەك حالىقتىڭ پىكىرىن ەسكەرە وتىرىپ قابىلدانادى. بۇل – مەملەكەت باسشىسىنىڭ باستى ۇستانىمى. دەمەك اەس سالۋ ماسەلەسىندە نەگىزگى شەشىمدى حالىق قابىلدايدى. اتوم ەنەرگەتيكاسى نە ءۇشىن قاجەت؟ ءبىزدىڭ بولاشاعىمىز ءۇشىن قاجەت. مەملەكەتىمىزدىڭ باسەكەگە قابىلەتىن ارتتىرۋ ءۇشىن قاجەت. اەس – عىلىم مەن تەحنولوگيانى دامىتۋ ءۇشىن قاجەت. تۇپتەپ كەلگەندە ەل تاۋەلسىزدىگىن نىعايتۋ, ەكونوميكاسىن ورنىقتى دامىتۋ ءۇشىن قاجەت, – دەدى ەرلان قوشانوۆ.
ءوز سوزىندە عالىم نۇرحات جاكيەۆ قازاقستانداعى ەنەرگيانىڭ 80%-عا جۋىعى بۇگىندە كومىر ارقىلى وندىرىلەتىنىنە جانە اتوم ەنەرگياسىن پايدالانۋ وسى جاعدايدان شىعۋدىڭ ەڭ ءتيىمدى جولى ەكەنىنە نازار اۋداردى.
– قازىر الەم وزگەرىپ جاتىر. ءبىز جاساندى ينتەللەكت, 6G ينتەرنەت, ەلەكتروموبيل, دروندار, بيوتەحنولوگيا, كۆانتتىق كومپيۋتەر سەكىلدى كيبەرعىلىم داۋىرىندە ءومىر ءسۇرىپ جاتىرمىز. بۇنىڭ ءبارى نەمەن جۇمىس ىستەيدى؟ ارينە, ەنەرگيا كوزدەرىنەن قۋات الادى. سوندىقتان دا, بىلەكتىڭ زامانىندا مىقتى بولعان ءبىز ءبىلىمنىڭ زامانىندا ارتتا قالماۋ ءۇشىن عىلىمنىڭ كۇشىنە سۇيەنىپ ەكولوگيالىق تۇرعىدان ءتيىمدى ەنەرگيانىڭ جولىن تابۋىمىز كەرەك. اەس قۇرىلىسى الداعى 100 جىلدا ەلىمىزدەگى ەلەكتر قۋاتى تاپشىلىعى ماسەلەسىن شەشەدى, جاڭا جۇمىس ورىندارى اشىلادى, – دەدى ول.
ءوز كەزەگىندە, «جاستار رۋحى» جاستار قاناتى ماڭعىستاۋ وبلىستىق فيليالىنىڭ توراعاسى ابزال مارات ءوڭىردى جىلۋمەن, تۇششى سۋمەن جانە ەلەكتر ەنەرگياسىمەن قامتاماسىز ەتىپ كەلە جاتقان ماڭعىستاۋ اتوم ەنەرگەتيكا كومبيناتى 56 جىلدان بەرى جۇمىس ىستەپ تۇرعانىنا نازار اۋداردى. ونىڭ ايتۋىنشا, بۇكىل الەم, سونىڭ ىشىندە قازاقستان بىرتىندەپ ەلەكتروموبيلدەرگە كوشۋدە, بۇل دا تۇراقتى ەنەرگيا كوزىنىڭ بولۋىن تالاپ ەتەدى.
ال جاس عالىم, ح.دوسمۇحامەدوۆ اتىنداعى اتىراۋ ۋنيۆەرسيتەتىنىڭ پرورەكتورى اسحات شۇكىروۆ بۇگىندە اتوم ەلەكتر ستانتسيالارىن پايدالاناتىن الەمنىڭ 32 ەلىنە دۇنيەجۇزىلىك ەكونوميكانىڭ جانە الەم حالقىنىڭ تەڭ جارتىسى تيەسىلى ەكەنىن اتاپ ءوتتى. بۇعان قوسا, الەمدەگى ەكسپورتتىق تاۋارلاردىڭ 70%-ىن وسى ەلدەر وندىرەدى. ونىڭ ايتۋىنشا, قازاقستان جاھاندىق دامۋدان شەت قالماۋعا ءتيىس. ول ءۇشىن بىزگە ەنەرگيا بەرىپ قانا قويماي, وتاندىق عىلىم مەن تەحنولوگيانى جاڭا دەڭگەيگە كوتەرەتىن اەس قاجەت.