جەرگىلىكتى لوكوموتيۆ دەپوسىنىڭ باستىعى ا.سماعۇلوۆ پەن جىلۋ ءماشينيسى م.مەيرامعازين 2022 جىلدىڭ قاڭتار-ءساۋىر ايلارى ارالىعىندا بۇرىن ازىرلەنگەن سحەما بويىنشا تۇتىنۋ كولەمىن جاساندى تۇردە ۇلعايتىپ, 920 ملن تەڭگەگە ديزەل وتىنىن زاڭسىز يەمدەنگەن, دەپ حابارلايدى Egemen.kz.
«سوتتا مەملەكەتتىك ايىپتاۋشى سوتتالعانداردىڭ ءوز باياندامالارىندا قاتتى جەل سياقتى ويدان شىعارىلعان قاتال اۋا رايى جاعدايلارىن جۇيەلى تۇردە كورسەتكەنىن دالەلدەدى. لوكوموتيۆتەردى پايدالانۋ كەزىندە ديزەلدىك وتىن شىعىنىنىڭ ۇلعايۋ سەبەبىن ءتۇسىندىرۋ ءۇشىن ولار وسىلايشا 3 مىڭ توننادان استام جانارمايدى يەمدەنىپ ۇلگەردى. قىلمىستىق سحەمانىڭ اشكەرەلەنۋى اباي وبلىسى بويىنشا قما جۇمىسىنىڭ ارقاسىندا مۇمكىن بولدى», دەلىنگەن باس كولىك پروكۋراتۋراسىنىڭ حابارلاماسىندا.
سوت ناتيجەسىندە دەپو باسشىسى سماعۇلوۆتى 8 جىلعا, ماشينيست مەيرامعازيندى 7 جىلعا باس بوستاندىعىنان ايىردى. سونىمەن قاتار ەكەۋى دە ماتەريالدىق-جاۋاپتى قىزمەت اتقارۋ قۇقىعىنان ايىرىلعان. جوعارىدا اتالعان زالال سوتتالعانداردان وندىرىلەدى.
ۇكىم زاڭدى كۇشىنە ەندى.