ءماجىلىستىڭ ەكولوگيا ماسەلەلەرى جانە تابيعات پايدالانۋ كوميتەتىنىڭ توراعاسى, «AMANAT» پارتياسى فراكتسياسىنىڭ مۇشەسى ەدىل جاڭبىرشين «ماەك» جشس-ءنىڭ ۇجىمىمەن كەزدەسىپ, كاسىپورىندى جاڭعىرتۋ بارىسىمەن تانىستى, دەپ حابارلايدى Egemen.ءkz ماجىلىستىڭ ءباسپاسوز قىزمەتىنە سىلتەمە جاساپ.
«ماەك» جشس – ماڭعىستاۋ وبلىسىنىڭ باس ەنەرگەتيكالىق كاسىپورنى. ايماق تۇرعىندارىنىڭ ەلەكترمەن, اۋىز سۋ جانە جىلۋمەن قامتاماسىز ەتىلۋى ونىڭ تۇراقتى جۇمىس ىستەۋىنە تىكەلەي بايلانىستى. سوندىقتان جابدىقتاردى جوندەۋ, جاڭعىرتۋ جانە الداعى جىلىتۋ ماۋسىمىنا دايىندىق ماسەلەلەرى ءماجىلىس دەپۋتاتتارىنىڭ ەرەكشە باقىلاۋىندا.
بىلتىر قازاندىق اگرەگاتتارى, رەزەرۆتىك قورعانىس جانە اۆتوماتيكا جۇيەلەرىن, سونداي-اق ەلەكتر ەنەرگياسىن باسقارۋ جانە ەسەپكە الۋ, اۆتوماتتاندىرىلعان جۇيەلەرىن جاڭعىرتۋ جۇمىستارى باستالعان. قازىرگى ۋاقىتتا جەو-1-دەگى№4 تۋربينا مەن №4 قازاندىعىنا جانە جەو-2-دەگى№11 قازاندىعىنا كۇردەلى جوندەۋ جۇرگىزىلىپ, بويلەر قوندىرعىلارىن جوندەۋ جانە باسقا دا جۇمىستار جالعاسۋدا. ال وڭىردەگى سۋ تاپشىلىعىن ازايتۋ ءۇشىن ماەك اۋماعىندا تاۋلىگىنە 24 مىڭ تەكشە مەتر سۋ وندىرەتىن تۇششىلاندىرۋ قوندىرعىلارىن سالۋ جوسپارلانىپ جاتىر.
ماجىلىسمەن ەدىل جاڭبىرشين ماڭعىستاۋ اتوم ەنەرگەتيكالىق كومبيناتىنىڭ ايماق ءۇشىن تۇراقتى جۇمىسىنىڭ ماڭىزدىلىعىنا توقتالىپ, كاسىپورىندى ودان ءارى دامىتۋ مەن جاڭعىرتۋ قاجەتتىگىن اتاپ ءوتتى.
«ەلىمىزدە ەنەرگوستانسا جابدىقتارىنىڭ, ينجەنەرلىك جەلىلەر مەن تۇرعىن ءۇي-كوممۋنالدىق شارۋاشىلىق ينفراقۇرىلىمىنىڭ توزۋى ونداعان جىلدار بويى جيناقتالعان ماسەلە جانە شۇعىل شەشۋدى تالاپ ەتەدى. تۇرعىندار ءۇشىن جارىق, سۋ, جىلۋ تۇراقتى جانە سەنىمدى تۇردە بەرىلۋى ءتيىس. بۇل ماسەلەلەردى جۇيەلى شەشۋدى «AMANAT» پارتياسى سايلاۋالدى باعدارلاماسىنا ەنگىزگەن بولاتىن جانە ونىڭ جۇزەگە اسۋىن دەپۋتاتتار قاتاڭ باقىلاۋعا الىپ جاتىرمىز. بيىل جازدا اقتاۋ تۇرعىندارى بىرنەشە كۇن سۋسىز قالدى, ءتىپتى شاعىن اۋدانداردا ءبىر اپتا, ال جەكەلەگەن ۇيلەردە ءبىر ايعا جۋىق سۋ بولمادى. مۇنداي جاعدايلاردى بولدىرماۋىمىز قاجەت. ول ۇشىن الداعى ۋاقىتتا ماەك-ءتىڭ جابدىقتارىن اعىمداعى جانە كۇردەلى جوندەۋلەرمەن بىرگە, ەلەكتر, سۋ جانە جىلۋ قۋاتتارىن ارتتىراتىن جاڭعىرتۋ جۇمىستارىن جۇرگىزۋ قاجەت. قازىر جوبالىق-سمەتالىق قۇجاتتار ازىرلەنۋدە. بۇل ۇلكەن قاراجاتتى تالاپ ەتەدى, مىسالى №3 جەس-نىڭ ءار بلوگىنا شامامەن كەمىندە 15 ميلليارد تەڭگە قاجەت», دەدى دەپۋتات.
ءوز كەزەگىندە «ماەك» جشس-ءنىڭ باس ديرەكتورى كينيس ۋراكوۆ بيۋدجەت قاراجاتىن يگەرۋ مەرزىمدەرىن زاڭنامالىق دەڭگەيدە قايتا قاراۋ قاجەتتىگىن ايتتى.
«تۋربينا, قازاندىق, گەنەراتورلار سياقتى جابدىقتاردىڭ كوپشىلىگى شەتەلدە شىعارىلادى. لوگيستيكانى ايتپاعاندا, ولاردىڭ ءوندىرىس مەرزىمى 8 ايعا دەيىن سوزىلادى. سول سەبەپتى بىزگە 3,6 ملرد تەڭگەنى مەملەكەتكە قايتارۋعا تۋرا كەلدى. سونداي-اق مەردىگەرلەردى اكىمدىك تەندەرى ارقىلى ەمەس, تىكەلەي ءوزىمىز جالداي الاتىنداي تەندەرلەردى وتكىزۋ تۋرالى نورمانى قايتا قاراۋدى ۇسىنامىز», دەدى ول.
ەدىل جاڭبىرشين بۇل ۇسىنىستار ءماجىلىستىڭ ءتيىستى كوميتەتىندە ۇكىمەتپەن بىرلەسە وتىرىپ جان-جاقتى زەردەلەنەتىنىن اتاپ ءوتتى.
ء«بىز, «AMANAT» پارتياسىنىڭ وكىلدەرى, كاسىپورىننىڭ جۇمىسىن تەكسەرىپ, قانداي كومەك كورسەتۋگە بولاتىنىن, زاڭدارعا قانداي وزگەرىستەر ەنگىزۋ كەرەكتىگىن جانە قانشالىقتى قارجىلاندىرۋدى قاجەت ەتەتىنىن انىقتايمىز. ماسەلەن, ۇكىمەتتەن بولىنەتىن قارجى تەك ءبىر جىلعا بولىنەدى, ونى يگەرىپ ۇلگەرمەيدى جانە قالدىق قاراجات قايتادان بيۋدجەتكە قايتارىلادى. وتكەن جىلى قاراجاتتىڭ ەداۋىر بولىگى قايتارىلدى. سوندىقتان قارجىنى يگەرۋ مەرزىمىن ۇزارتۋ قاجەت», دەدى ماجىلىسمەن.
ەسكە سالا كەتەيىك, بۇعان دەيىن مەملەكەت باسشىسى سالاداعى «كولەڭكەلى» سحەمالاردى رەتكە كەلتىرۋگە جانە جويۋعا باعىتتالعان «جىلۋ ەنەرگەتيكاسى تۋرالى» زاڭعا قول قويعان بولاتىن. بۇل تاريف بەلگىلەۋ قاعيداتتارىن ايقىنداۋ, ەلدى مەكەندەردى جىلۋمەن جابدىقتاۋ جۇيەلەرىن جەتىلدىرۋ سحەمالارىن ەنگىزۋ, نىسانداردى جىلىتۋ ماۋسىمىنا ءتيىستى دايىندىق جاساماعانى ءۇشىن ايىپپۇل سالۋ, مەملەكەتتىك باقىلاۋ فۋنكتسيالارىن كۇشەيتۋ جانە تاعى دا باسقا كوپتەگەن شارالاردى قامتيدى.