كەشە, 20 تامىزدا ۇبت قورىتىندىسى بويىنشا جوعارى بالل جيناپ, بىراق گرانتقا تۇسپەگەن ءبىرىنشى تالاپكەر عىلىم جانە جوعارى ءبىلىم مينيسترلىگىنە اكىمشىلىك شاعىم ءتۇسىردى. بۇل تۋرالى ادۆوكات حاليدا اجىعۇلوۆا Instagram پاراقشاسىندا مالىمدەدى, دەپ حابارلايدى Egemen.kz
قۇقىق قورعاۋشىنىڭ ايتۋىنشا, گرانتسىز قالعان 200-گە جۋىق تالاپكەر ءوز قۇقىقتارىن قورعاۋدى سۇراپ, كومەك سۇراعان.
«وكىنىشكە قاراي, مينيسترلىك ءوز قاتەسىن ءالى مويىنداماي وتىر, زاڭنامانى بۇزىپ تج كۆوتاسىن رۇقساتسىز ەنگىزۋگە قۇقىلىمىز دەپ سانايدى. بىراق مينيسترلىك ءوز كۇشىمەن جەڭىپ تۇرعان گرانتتارىنان زاڭسىز ايىرىلعان تالاپكەرلەردى ۇنەمى كوزگە ىلمەي جۇرە بەرە المايدى. گرانت ءۇشىن جىلدار بويى ەڭبەك ەتكەن بالالاردىڭ قۇقىعىن شەكتەپ, تاسقىننان زارداپ شەككەن باسقا بالالارعا كومەكتەسۋگە بولمايدى. باسقانىڭ ەسەبىنەن قايىرىمدىلىق جاساۋعا بولمايدى. مەنىڭ ويىمشا, ۇمىتكەرلەر وزدەرىنىڭ قۇقىقتارىن قورعاۋعا جانە ولارعا تەڭ دارەجەدە لايىقتى مەملەكەتتىك گرانتتار بەرۋدى تالاپ ەتۋگە تولىق قۇقىلى دەپ سانايمىن. ۇمىتكەرلەر ادىلەتسىزدىكتەن زارداپ شەكتى دەپ ەسەپتەيمىن. ەندى مۇنداي ادىلەتسىزدىككە نە سەبەپ بولعانىن انىقتاۋ ماڭىزدى: شەنەۋنىكتەردىڭ قابىلەتسىزدىگى نەمەسە زاڭناماداعى ولقىلىقتار», دەپ جازدى حاليدا اجىعۇلوۆا.
زاڭگەر ۇبت ناتيجەلەرى بويىنشا جوعارى بالل جيناعان كەيبىر تۇلەكتەر بيىل جوعارى ءبىلىم الۋ مۇمكىندىگىنەن ايىرىلعانىن اتاپ ءوتتى. سونداي-اق ۋنيۆەرسيتەتتەر جوعارى بالل العانىنا قاراماستان كەيبىر بالالارعا ىشكى گرانتتاردى بەرۋدەن باس تارتقانىن تىلگە تيەك ەتتى.