شەت مەملەكەتتەردىڭ جوعارى وقۋ ورىندارىندا ءبىلىم الىپ جاتقان قازاقستاندىق اسكەري قىزمەتشىلەر قازاقستان رەسپۋبليكاسى پرەزيدەنتى سايلاۋىندا داۋىس بەرۋگە قاتىستى.
بۇل ءۇشىن ون ەلدىڭ ءىرى قالالارىندا بىرىڭعاي سايلاۋ ۋچاسكەلەرى ۇيىمداستىرىلعان بولاتىن. مىسالى, تۆەر, ريازان, سمولەنسك, ياروسلاۆل, كراسنودار, ۆورونەج, كوستروما قالالارىنداعى اسكەري جوعارى وقۋ ورىندارىنىڭ كۋرسانتتارى مەن تىڭداۋشىلارى ءۇشىن بىرىڭعاي سايلاۋ پۋنكتى ماسكەۋدە اشىلدى. مۇندا تاڭ اتىسىمەن 159 اسكەري قىزمەتشى داۋىس بەرىپ ۇلگىردى.
«قازاقستان پرەزيدەنتىنىڭ سايلاۋىنا قاتىسۋ – ءبىزدىڭ كونستيتۋتسيالىق قۇقىعىمىز جانە ازاماتتىق بورىشىمىز. بۇل شارا – ەل تاعدىرى. مەملەكەت باسشىسىن تاڭداۋ ارقىلى ءبىز ءوز بولاشاعىمىزعا, تۇتاستاي ەلىمىز قادام باسار جولعا تاڭداۋ جاسايمىز. مەن ءاربىر قازاقستاندىقتىڭ داۋىسى ماڭىزدى دەپ سانايمىن. ءبىزدىڭ ارقايسىمىز سايلاۋعا وسى جاۋاپكەرشىلىكتى تۇسىنە وتىرىپ كەلدىك. تۋعان ەلىمىزدەن جىراقتا جۇرسەك تە, ونىڭ تاعدىرى ءبىزدى بەي-جاي قالدىرماۋى ءتيىس دەپ ويلايمىن», دەيدى رەسەي فەدەراتسياسى قورعانىس مينيسترلىگى اسكەري ۋنيۆەرسيتەتى 5-كۋرسىنىڭ كۋرسانتى دانيار جانجۇمەنوۆ.
وسىلايشا داۋىس بەرۋ ءبىزدىڭ اسكەري قىزمەتشىلەرىمىز جۇرگەن باسقا ەلدەردە دە ءوتتى. ولاردىڭ ءاربىرى سايلاۋ ۋچاسكەسىنە جەتە الۋى ءۇشىن كۇنى بۇرىن بارۋ جانە قايتۋ باعىتتارىنا اۋە جانە تەمىرجول كولىكتەرىنە بيلەتتەر الىنعان بولاتىن.
قازاقستان رەسپۋبليكاسى پرەزيدەنتى سايلاۋىنا رەسەيدە (248 ادام), بەلارۋستە (35 ادام), ۋكراينادا (19 ادام), تۇركيادا (73 ادام), وڭتۇستىك كورەيادا (4 ادام), اقش-تا (8 ادام), قىتايدا (30 ادام), ۇلىبريتانيادا (1 ادام), گەرمانيادا (1 ادام) جانە ءۇندىستاندا (12 ادام) اسكەري جوعارى وقۋ ورىندارىندا وقۋدا جۇرگەن بارلىعى 437 قازاقستاندىق كۋرسانت پەن وفيتسەر قاتىسىپ ۇلگەردى. ورنالاسقان جەرلەرىنە قاراماستان, ولاردىڭ ارقايسىسى ءوز ازاماتتىق بورىشىن اتقارىپ, ءوز تاڭداۋىن جاسادى.