19 تامىزدا تۇركىستان قالاسىندا تۇركى الەمىنىڭ جاس عالىمدارىنا ارنالعان جازعى مەكتەپتىڭ اشىلۋ سالتاناتى ءوتتى. يگى شارانى تۇركى اكادەمياسى تۇركيا عىلىم اكادەمياسى (TÜBA), تۇرىك ءتىلى قوعامى (TDK) جانە قوجا احمەت ياساۋي اتىنداعى حالىقارالىق قازاق-تۇرىك ۋنيۆەرسيتەتىمەن بىرلەسىپ ۇيىمداستىردى, دەپ حابارلايدى Egemen.kz.
جازعى مەكتەپتەردىڭ اشىلۋ سالتاناتىنا تۇركى اكادەمياسىنىڭ پرەزيدەنتى شاھين مۇستافاەۆ, تۇركيا عىلىم اكادەمياسىنىڭ پرەزيدەنتى مۇزاففەر شەكەر, تۇرىك ءتىلى قوعامى توراعاسىنىڭ ورىنباسارى حارۋن شاھين, قوجا احمەت ياساۋي اتىنداعى حالىقارالىق قازاق-تۇرىك ۋنيۆەرسيتەتىنىڭ رەكتورى جانار تەمىربەكوۆا, ۇلتتىق عىلىم اكادەمياسىنىڭ ءبولىم مەڭگەرۋشىسى انار مۇحتاروۆا, سونداي-اق باۋىرلاس تۇركى ەلدەرىنەن كەلگەن جەتەكشى پروفەسسورلار مەن وقىتۋشىلار قاتىستى.
جيىننىڭ اشىلۋىندا ءسوز سويلەگەن شاھين مۇستافاەۆ تۇركى الەمىنىڭ جاس عالىمدارى اراسىنداعى عىلىمي بايلانىستى نىعايتۋدىڭ ماڭىزدىلىعىنا توقتالدى. ول جازعى مەكتەپتەردىڭ نەگىزگى ماقساتى ءبىلىم جانە تاجىريبە الماسۋ, سونىمەن قاتار ءوزارا دوستىق جانە كاسىبي ىنتىماقتاستىعى بەكەم قابىلەتتى جاس زەرتتەۋشىلەر جەلىسىن قۇرۋ ەكەنىن اتاپ ءوتتى.
بيىلعى جازعى مەكتەپ باعدارلامالارىنىڭ ەرەكشەلىگى – «تۇركولوگيا» جانە «جاڭا ەنەرگەتيكالىق تەحنولوگيالار» اتتى قوس مەكتەپتىڭ العاش رەت قاتار اشىلۋى. اكادەميا باسشىسى اتالعان ەكى سالانىڭ قامتىلۋى تۇركى حالىقتارىنىڭ مادەني جانە عىلىمي بايلانىستارىنىڭ ماڭىزدىلىعىن بىلدىرەتىنىن ايتتى.
«تۇركىتانۋ» مەكتەبىنە ازەربايجان, گەرمانيا, قازاقستان, قىرعىزستان, وزبەكستان, رەسەي, ۋكراينا, موڭعوليا, تۇركيا جانە سولتۇستىك ماكەدونيادان 28 جاس عالىم قاتىسىپ جاتىر. سونداي-اق «جاڭا ەنەرگەتيكالىق تەحنولوگيالار» بويىنشا جازعى مەكتەپتە ازەربايجان, قازاقستان, وزبەكستان, البانيا جانە تۇركيادان 21 قاتىسۋشى بار. ولارعا ءتۇرلى تۇركى ەلدەرىنەن تانىمال 37 عالىم ءدارىس وقيدى.
«تۇركىتانۋ» بويىنشا جازعى مەكتەپ باعدارلاماسى تۇركى حالىقتارىنىڭ تاريحىن, ارحەولوگياسىن, ءتىلى مەن ادەبيەتىن تەرەڭدەتىپ وقىتۋعا باعىتتالعان. جاس عالىمدار مەن زەرتتەۋشىلەر ءۇشىن ارنايى ازىرلەنگەن تەوريالىق جانە پراكتيكالىق سەسسيالار ولاردىڭ بىلىمدەرىن تەرەڭدەتىپ قانا قويماي, ءوز جوبالارىن ۇسىنۋعا جانە تاجىريبە الماسۋعا مۇمكىندىك بەرەدى. تۇركىتانۋ مەكتەبىنىڭ وزەكتى تاقىرىپتارىنىڭ ءبىرى تۇركى الەمى كونتسەپتسياسىن قالىپتاستىرعان تۇڭعىش عىلىمي ەڭبەك «ديۆان لۇعات ات-تۇركتى» زەرتتەۋ بولىپ تابىلادى.
«جاڭا ەنەرگەتيكالىق تەحنولوگيالار» مەكتەبىنىڭ ماقساتى – قاتىسۋشىلارعا ەنەرگەتيكا سالاسىنداعى سوڭعى جەتىستىكتەر, ماسەلەلەر مەن مۇمكىندىكتەر تۋرالى جان-جاقتى تۇسىنىك بەرۋ. باعدارلاما ەنەرگيا ءوندىرۋدىڭ نەگىزگى پرينتسيپتەرى مەن ءداستۇرلى ادىستەرىمەن قوسا, بولاشاق ەنەرگيا قاجەتتىلىكتەرىن قاناعاتتاندىرۋ ءۇشىن ماڭىزدى يننوۆاتسيالىق جانە تۇراقتى شەشىمدەردى قامتيدى.
تۇركى اكادەمياسىنىڭ باسشىسى شاھين مۇستافاەۆ جازعى مەكتەپتەردەگى اپتالىق ساباقتار قاتىسۋشىلاردىڭ ءبىلىمىن تەرەڭدەتۋگە جانە ولاردىڭ ءارتۇرلى ەلدەردەگى ارىپتەستەرىمەن بايلانىسىن نىعايتۋعا ىقپال ەتەرىنە سەنىم ءبىلدىرىپ, الداعى وقۋ اپتاسىنا ساتتىلىك تىلەدى.