الماتىداعى بالالار كارديوحيرۋرگياسى جانە پەريناتولوگيا ورتالىعىندا قۇرساقتاعى ۇرىققا وپەراتسيا ءساتتى جاسالدى. مۇنداي وپەراتسيا تۋا ءبىتتى بولاتىن پاتولوگيانى تۇزەتىپ, ءسابيدىڭ دۇنيەگە دەنى ساۋ بولىپ كەلۋىنە مۇمكىندىك بەرەدى, دەپ حابارلايدى Egemen.kz.
ورتالىق دارىگەرلەرى مينسك رەسپۋبليكالىق عىلىمي-تاجىريبەلىك «انا مەن بالا» ورتالىعى فەتالدى مەديتسينا بولىمشەسىنىڭ مەڭگەرۋشىسىمەن بىرگە الماتى قالاسى, الماتى جانە اقمولا وبلىستارىنان كەلگەن ءۇش جۇكتى ايەلگە وتا جاسادى. وتانى جاساۋ اياسىندا مىنا جۇمىستار اتقارىلدى:
- فەتو-فەتالدى ترانسفۋزيا سيندرومىنان (ففتس) اسقىناتىن كوپۇرىقتى جۇكتىلىك كەزىندەگى بالانىڭ جولداسى اناستوموزىنىڭ لازەرلى كواگۋلياتسياسى. بۇل ءادىس ۇرىقتار اراسىنداعى تامىرلاردىڭ پاتولوگيالىق بىرىگۋىن جويۋعا اسەر ەتىپ, قاتتى اسقىنۋدىڭ الدىن الادى جانە ەگىزدەردىڭ ەكەۋىنىڭ دە ءومىرىن ساقتايدى.
- شارانا سۇيىقتىعى پاتولوگياسى بولعان جاعدايداعى امنيورەدۋكتسيا جانە امنيوينفۋزيا. بۇل پروتسەدۋرالار ۇرىقتىڭ دامۋىنا قولايلى جاعداي تۋعىزا جانە اسقىنۋ قاۋپىن ازايتا وتىرىپ شارانا سۇيىقتىعى مولشەرىن رەتتەۋگە كومەكتەسەدى.
- ۇرىقتىڭ بۇيرەك پاتولوگياسى بولعاندا قۋىقتى درەناجداۋ. بۇل وتا ۇرىقتىڭ نەسەپ ايداۋ جۇيەسىنىڭ دۇرىس جۇمىس ىستەۋىن قامتاماسىز ەتەدى جانە ونىڭ دۇرىس دامۋ مۇمكىندىگىن جاقسارتا وتىرىپ بۇيرەك جەتىسپەۋشىلىگى اسقىنۋىنىڭ الدىن الادى. دەنساۋلىق ساقتاۋ مينيسترلىگىنىڭ مالىمەتىنشە, بارلىق وپەراتسيا ءساتتى جاسالعان. قازىر ناۋقاستاردىڭ جاعدايى تۇراقتى. ولاردىڭ جۇكتىلىك كەزىندەگى دەنساۋلىعىن ماماندار ۇدايى باقىلاپ, ۇرىقتىڭ ودان ءارى دۇرىس دامۋىن قامتاماسىز ەتەدى.بۇل وتالار دەنساۋلىق ساقتاۋ مينيسترلىگىنىڭ «فەتالدى مەديتسينا» جوباسىنىڭ اياسىندا جاسالدى. ەندى ەلىمىزدەگى ايەلدەر الەمدىك ستاندارتتارعا ساي كەلەتىن جوعارى تەحنولوگيالى كومەك الىپ, دۇنيەگە دەنى ساۋ بالا اكەلە الادى. اتالعان جوبا وزىق مەديتسينالىق تەحنولوگيالارعا قولجەتىمدىلىكتى ۇلعايتۋعا جانە قازاقستانداعى جۇكتى ايەلدەردىڭ بوسانار الدىنداعى كومەك دەڭگەيىن جاقسارتۋعا باعىتتالعان.