كوللەدجدەردە تەگىن ءبىلىم الۋعا مۇمكىندىك مولايدى. وقۋ-اعارتۋ مينيسترلىگىنىڭ جاقىندا جاريالاعان جاڭالىعىنا سۇيەنسەك, تەحنيكالىق جانە كاسىپتىك ءبىلىم ۇيىمدارىندا ءبىلىم الۋعا 145 مىڭ گرانت ءبولىندى.
جاڭا وقۋ جىلىندا ەلىمىزدىڭ كوللەدجدەرىندە مەملەكەتتىك ءبىلىم تاپسىرىسىنىڭ كولەمى 145 مىڭ ورىنعا دەيىن ارتتى. بۇل وتكەن جىلمەن سالىستىرعاندا 12 مىڭ ورىنعا كوپ. وسىلايشا, ستۋدەنتتەردى سۇرانىسقا يە ماماندىقتار بويىنشا تەگىن تەحنيكالىق جانە كاسىپتىك بىلىممەن قامتۋ 90%-دى قۇرادى.
مينيسترلىكتىڭ مالىمدەۋىنشە, مەملەكەت باسشىسىنىڭ تاپسىرماسىمەن مەملەكەتتىك تاپسىرىستىڭ 65%-ى ماشينا جاساۋ, كولىك, ەنەرگەتيكا, IT, قۇرىلىس جانە ينجەنەريا سەكىلدى تەحنيكالىق ماماندىقتارعا باعىتتالعان. 2025 جىلعا قاراي بۇل كورسەتكىش 70%-عا, ال مەملەكەتتىك تاپسىرىس كولەمى 100%-عا دەيىن وسەدى. سونىمەن قاتار كوللەدجدەرگە تالاپكەرلەردى كاسىپورىنداردىڭ وتىنىمدەرى نەگىزىندە جۇمىسقا ورنالاستىرۋ مىندەتتەمەسىمەن قابىلداۋ جالعاسىپ جاتىر. وسى اتالعان جۇيەمەن جىل سايىن 10 مىڭ تالاپكەر قابىلدانادى. مۇنداي باعىت كادرلاردى ەڭبەك نارىعىنىڭ تالابىنا سايكەس دايارلاۋعا مۇمكىندىك بەرەدى.
وقۋ-اعارتۋ مينيسترلىگىنىڭ حابارلاۋىنا قاراعاندا, تەحنيكالىق جانە كاسىپتىك ءبىلىم سالاسىندا مامان دايارلاۋدىڭ ماڭىزدى بولىگى – بيزنەسپەن ىنتىماقتاستىق قۇرۋ. قازىرگى ۋاقىتتا 518 كاسىپورىن 410 كوللەدجدىڭ تۇلەكتەرىن پراكتيكالىق دايارلاۋعا, جۇمىسقا ورنالاستىرۋدى قامتاماسىز ەتە وتىرىپ, ءدۋالدى وقىتۋعا جانە قامقورلىق كورسەتۋگە قاتىسىپ وتىر. قابىلدانعان سول شارالاردىڭ بارلىعى جاس مامانداردى كاسىبي دايارلاۋعا جانە ەلىمىزدىڭ كادرلىق الەۋەتىن ارتتىرۋعا باعىتتالعان.