بۇل تۋرالى دەنساۋلىق ساقتاۋ ءبىرىنشى ۆيتسە-ءمينيسترى تيمۋر سۇلتانعازيەۆ ورتالىق كوممۋنيكاتسيالار قىزمەتىندە وتكەن بريفينگتە ايتتى, دەپ حابارلايدى Egemen.kz.
مينيسترلىك رەسپۋبليكادا تۇماۋ بويىنشا ەپيداحۋال قالىپتى دەپ وتىر.
«بيىل تۇماۋعا قارسى رەسەيلىك «گريپپول» ۆاكتسيناسىنىڭ 2,2 ملن دوزاسى ساتىپ الىندى. 1 قىركۇيەككە دەيىن بارلىق مەديتسينالىق ۇيىم ۆاكتسيناتسياعا دايىن بولۋى ءتيىس», دەدى تيمۋر سۇلتانعازيەۆ تىلشىلەردىڭ ساۋالىنا بەرگەن جاۋابىندا.
دسم ءبىرىنشى ۆيتسە-ءمينيسترىنىڭ سوزىنشە, مەديتسينالىق قىزمەتكەرلەر, بالالار, جۇكتى ايەلدەر, سوزىلمالى اۋرۋى بار ەرەسەك ادامدار, مەديتسينالىق-الەۋمەتتىك ۇيىمداردا تۇراتىندار ەكپەنى تەگىن الادى. ازاماتتاردىڭ قالعان ساناتى ەكپەنى اقىلى تۇردە الۋىنا بولادى. تيمۋر سۇلتانعازيەۆ جەكەمەنشىك ەمحانالار مەن ءدارىحانا جەلىلەرى تۇماۋعا قارسى ۆاكتسينانى ساتىپ الاتىنىن جەتكىزدى.
سانيتاريالىق-ەپيدەميولوگيالىق باقىلاۋ كوميتەتى توراعاسىنىڭ ورىنباسارى زاۋرە احمەتوۆانىڭ ايتۋىنشا, جىل سايىن ەلىمىزدە حالىقتىڭ 12 پايىزدان استامى تۇماۋعا قارسى ەكپە الادى.