«حالىقتىڭ ەرەكشە قۇلشىنىسى بايقالدى»

سەرگەي پچەلياكوۆ, تمد بايقاۋشىلار ميسسياسىنىڭ مۇشەسى: ەلىمىز ءۇشىن ساياسي ماڭىزى زور ناۋقاننىڭ ءوتۋ بارىسىن باقىلاعان شەتەلدىك تاۋەلسىز باقىلاۋشىلار سايلاۋ بارىسىندا ەشقانداي زاڭ بۇزۋشىلىقتاردىڭ ورىن الماعاندى­عىن مالىمدەدى. سەرگەي پچەلياكوۆ – رەسەيدىڭ التاي ولكەسىنەن شىعىس وڭىرىندەگى سايلاۋ بارىسىن باقىلاۋعا كەلگەن دەلەگاتسيا قۇرامىنداعى 27 ادامنىڭ ءبىرى. ول ارىپتەستەرىمەن بىرگە وسكەمەن قالاسىنداعى بىرقاتار سايلاۋ ۋچاسكەلەرىندە تۇسكە دەيىن قىزمەت اتقارسا, كۇننىڭ ەكىنشى بولىگىندە وبلىستىڭ گلۋبوكوە اۋدانىنا ارنايى شىقتى. رۋبتسوۆ قالاسى باسشىسىنىڭ ورىنباسارى بولىپ قىزمەت ەتەتىن بايقاۋشى قازاقستاندىق سايلاۋدا بىرقاتار ەرەكشەلىكتەردى بايقاعانىن جەتكىزدى. – مەن مۇنداي جاۋاپتى ناۋقانعا بايقاۋشى رەتىندە ءبىرىنشى رەت قاتىسىپ وتىرمىن. ال, ارىپتەستەرىمنىڭ اراسىندا ءۇشىنشى, ءتورتىنشى مارتە قاتىسقاندار بار. ءبىز وسكەمەن قالاسىنا 24 ساۋىردە كەلدىك. كەلگەننەن بەرى بىرنەشە توپتارعا ءبولىنىپ, جۇمىس ىستەۋدەمىز. ءبىر توبىمىز 25 ساۋىردە زىريان اۋدانىنا اتتانىپ كەتتى, بۇگىن دە سول جاقتا جۇمىس ىستەيتىن بولادى. سايلاۋ ۋچاسكەلەرى اشىلا سالىسىمەن وسكەمەن قالاسىنداعى بەس سايلاۋ ۋچاسكەسىندە بولدىق. قازىر №82 جانە 83 سايلاۋ ۋچاسكەلەرىندە جۇمىس ىستەۋدەمىز. بايقاعانىمىز, جەرگىلىكتى تۇرعىندار وتە ساۋاتتى ەكەن. سايلاۋ تۋرالى جاقسى حاباردار ەتىلگەن, ءتيىستى شارالار جوعارى دەڭگەيدە ويداعىداي ۇيىمداستىرىلعانىن اتاپ وتكىم كەلەدى. ۋچاسكەلەر اشىلماي تۇرىپ كەلگەن سايلاۋشىلاردى بايقادىق. تۇسكى ساعات ون ءبىر جارىمعا دەيىن ءار ۋچاسكەلەرگە سايلاۋشىلاردىڭ 50 پايىزدان استامى كەلىپ, داۋىس بەرىپ ۇلگەردى. بايقاۋشىلار تاراپىنان ەشقانداي زاڭ بۇزۋشىلىقتار تىركەلگەن جوق. سايلاۋ بارىسىندا جاستاردىڭ بەلسەندىلىگى بايقالدى. ماسەلەن, د.سەرىكباەۆ اتىنداعى شقمتۋ-دىڭ باس وقۋ عيماراتىندا ورنالاسقان №74 سايلاۋ ۋچاسكەسىندە كۇننىڭ العاشقى جارتىسىندا ستۋدەنت جاستاردىڭ باسىم بولىگى ءوز تاڭداۋلارىن جاساپ ۇلگەردى. جازىپ العان دۋمان اناش, «ەگەمەن قازاقستان». شىعىس قازاقستان وبلىسى.