كاسىپقوي بوكسشى, 69 كەلىدە ريو-دە-جانەيرو - 2016 وليمپياداسىنىڭ چەمپيونى دانيار ەلەۋسىنوۆ رينگكە ورالادى. بۇل تۋرالى all.stars.boxing.kz كومپانياسى حابارلادى, دەپ جازادى Egemen.kz.
دانيار ەلەۋسىنوۆ 28 قىركۇيەك كۇنى الماتى ارەنادا وتەتىن بوكس كەشىندەگى باستى جەكپە-جەكتە قولعاپ تۇيىستىرەدى.
ونىڭ كىمگە قارسىلاس اتاناتىنى ءالى انىقتالعان جوق.
ايتا كەتەيىك, دانيار ەلەۋسىنوۆ كاسىپقوي رينگتەگى كەيىنگى كەزدەسۋىن 2021 جىلدىڭ جەلتوقسان ايىندا استانادا وتكىزگەن. وتانداسىمىز سول جەكپە-جەكتە ارگەنتينالىق حۋان ەرنان لەالدان تورەشىلەردىڭ ءبىراۋىزدان شەشىمىمەن جەڭىسكە جەتىپ, IBO تۇجىرىمى بويىنشا جارتىلاي ورتا سالماقتاعى تيتۋلدى جەڭىپ العان بولاتىن.