قازاقستان تۇرعىندارى ءوز تاڭداۋلارىن جاساپ, ەلدىڭ بولاشاعى ءۇشىن ءوز داۋىستارىن بەرگەن-ءدى. ارينە, سايلاۋدىڭ الدىن الا قورىتىندىسى كىم-كىمدى دە قىزىقتىرماي قويمايدى. وسىعان وراي «Zakon.kz» اقپاراتتىق پورتالى ارنايى تاپسىرىس بەرىپ, الەۋمەتتىك زەرتتەۋلەر جۇرگىزىلگەنى ءمالىم بولدى. سونىڭ ناتيجەسىمەن الەۋمەتتىك-ساياسي زەرتتەۋلەر ينستيتۋتىنىڭ ديرەكتورى ايگۇل سادۋاقاسوۆا بۇقارالىق اقپارات قۇرالدارى وكىلدەرىمەن ءبولىستى.
نەگىزىنەن, مۇنداي ەكزيت-پۋلداردىڭ ماقساتى – ەلەكتوراتقا سۇراۋ سالۋ قورىتىندىسى بويىنشا جەدەل بولجامدار بەرۋ. بۇل رەتتە ينستيتۋت ديرەكتورى سايلاۋ كۇنى قازاقستان حالقى ءۇشىن ەرەكشە كۇن بولعاندىعىن ەرەكشە اتاپ كەتتى. «سونىمەن قاتار, ءبىزدىڭ الەۋمەتتىك-ساياسي زەرتتەۋلەر ينستيتۋتى كۇن بارىسىندا سايلاۋ ناۋقانى كەزىندە سايلاۋشىلار ءوز داۋىستارىن قاي كانديداتقا بەردى, قالاي سايلادى جانە وزدەرىنىڭ كوزقاراستارىن ءبىلدىردى دەگەن ساۋالناما قويىپ, سوڭىندا ءبىر ناتيجەگە كەلدىك», دەدى ا.سادۋاقاسوۆا.
ونىڭ ايتۋىنشا, ەxit-poll ادىستەمەسىنە نەگىزدەلگەن الەۋمەتتىك زەرتتەۋلەر سايلاۋ ۋچاسكەسىنەن داۋىس بەرىپ شىققان سايلاۋشىلارعا قاتىستى جۇرگىزىلگەن. ينستيتۋت ديرەكتورىنىڭ ءمالىمدەۋىنشە, ساۋالداما بارىسىندا ەشبىر سايلاۋشىنىڭ قۇقى بۇزىلماعان. جالپى, ساۋالداماعا سايلاۋدان شىققان ءاربىر بەسىنشى قازاقستان ازاماتى جاۋاپ بەرىپتى.
ساۋالداماعا جاۋاپ بەرۋشى تولىق رۇقسات بەرگەن كەزدە عانا ينتەرەرلەر سۇراقتار قويىپ وتىرىپتى.
«قازاقستاننىڭ بارلىق ايماقتارى بويىنشا ءبىزدىڭ ساۋالداماعا 40 مىڭ رەسپوندەنت قاتىستى. جالپى رەسپۋبليكا بويىنشا 164 سايلاۋ ۋچاسكەسى قامتىلدى. وبلىس ورتالىقتارى, استانا مەن الماتى قالالارى بويىنشا بارلىعى 84 ۋچاسكە, شاعىن قالالاردا – 2 جانە اۋىلدىق ايماقتار مەن اۋىلدىق وكرۋگتەردە 38 ۋچاسكە قامتىلدى», – دەدى ا.سادۋاقاسوۆا.
ساۋالداما جۇرگىزۋ جۇمىسىنا ەلىمىزدىڭ بارلىق ايماقتارى بويىنشا 350-دەن استام ادام اتسالىسقانى دا اتالماي قالمادى. ينستيتۋت ديرەكتورىنىڭ مالىمەتىنە قاراعاندا, ءبىر كۇن ىشىندە ساۋالدامانىڭ ءتورت تولقىنى جۇرگىزىلگەن.
سونىمەن, سايلاۋدىڭ الدىن الا قورىتىندىسى بويىنشا ساۋالداماشىلاردىڭ 97,64 پايىزى ءوز داۋىستارىن كانديدات نۇرسۇلتان ءابىش ۇلى نازارباەۆقا بەرگەنى ءمالىم بولدى. ەكىنشى تۇعىردان كورىنگەن پرەزيدەنتتىككە كانديدات تۇرعىن ىسقاق ۇلى سىزدىقوۆقا رەسپوندەنتتەردىڭ 1,59 پايىزى ءوز داۋىستارىن بەرىپتى. ال ءۇشىنشى ورىندى قاناعات تۇتقان كانديدات ابىلعازى قالياقپار ۇلى قۇسايىنوۆ سايلاۋشىلاردىڭ 0,77 پايىز داۋىسىن الىپتى.
اسقار تۇراپباي ۇلى,
«ەگەمەن قازاقستان».