سىبايلاس جەمقورلىققا قارسى ءىس-قيمىل اگەنتتىگى ەلىمىزگە قۇنى 1 تريلليون تەڭگەدەن اساتىن اكتيۆتەر قايتارىلعانىن حابارلادى, دەپ جازادى Egemen.kz.
سوڭعى 2,5 جىلدا, ونىڭ ىشىندە وليگوپوليالار تاراپىنان قازاقستان حالقىنا 1,09 ترلن تەڭگە قايتارىلدى.
ەستەرىڭىزگە سالا كەتەيىك, بۇعان دەيىن اگەنتتىك زالالدى وتەۋ رەتىندە ق. ساتىبالدى ۇلى قايتارعان جىلجىمايتىن م ۇلىك وبەكتىلەرىن مەملەكەتكە بەرۋ تۋرالى حابارلاعان بولاتىن. ولاردىڭ ىشىندە الماتىداعى قۇنى 7,9 ملرد تەڭگەدەن اساتىن «Kaisar Tower» بيزنەس-ورتالىعى بار, ول قازاق ۇلتتىق قىزدار پەداگوگيكالىق ۋنيۆەرسيتەتىنىڭ قاراماعىنا بەرىلگەن. سونىمەن قاتار ت. جۇرگەنوۆ اتىنداعى «قازاق ۇلتتىق ونەر اكادەمياسى» رمم تەڭگەرىمىنە قۇنى 800 ملن تەڭگەدەن اساتىن اكىمشىلىك عيمارات بەرىلدى.
ەلوردادا قۇنى 5 ملرد تەڭگەدەن اساتىن ءۇش ءزاۋلىم ساراي مۇگەدەك بالالارعا ارنالعان استانا قالاسى اكىمدىگىنىڭ «پسيحولوگيالىق-پەداگوگيكالىق تۇزەتۋ كابينەتى» كمم-نە بەرىلدى. بۇل ءبىلىم بەرۋ جاعدايلارىن ەداۋىر جاقسارتۋعا جانە شىعارماشىلىق باستامالاردىڭ دامۋىن قولداۋعا مۇمكىندىك بەرەدى.
سونىمەن قاتار, حالىقارالىق ىنتىماقتاستىق ماڭىزدى ءرول اتقارادى, سونىڭ ارقاسىندا اۆستريا, فرانتسيا, ليحتەنشتەين, امىرلىكتەر, تۇركيا, رەسەي جانە باسقا ەلدەردەن قازاقستانعا اقشا, باعالى قاعازدار, جىلجىمايتىن م ۇلىك جانە زەرگەرلىك بۇيىمدار تۇرىندەگى اكتيۆتەر قايتارىلدى.
ماسەلەن, اۆستريادان 36,8 ملرد تەڭگە, ليحتەنشتەيننەن 116,7 ملرد تەڭگە, تۇركيادان 2,2 ملرد تەڭگە, بىرىككەن اراب امىرلىكتەرىنەن 6,3 ملرد تەڭگە جانە باسقا ەلدەردەن قايتارىلدى.
بۇدان باسقا, لاۋازىمدىق وكىلەتتىكتەرىن تەرىس پايدالانعانى ءۇشىن سوتتالعان يندۋستريا جانە ينفراقۇرىلىمدىق دامۋ ەكس-ۆيتسە-ءمينيسترى ت. توقتاباەۆقا قاتىستى قىلمىستىق ءىس بويىنشا مەملەكەت پايداسىنا قوستاناي وبلىسىنداعى قۇنى 5,6 ترلن تەڭگەدەن اساتىن نيكەل مەن كوبالتتىڭ ءىرى قورلارى بار بىرەگەي «شەۆچەنكوۆسكوە» كەن ورنى بەرىلدى.
زاڭسىز ساتىپ الىنعان اكتيۆتەردى قايتارۋ بويىنشا جۇمىستار ءالى دە جالعاسادى.