ءامىر مايمۇراتوۆ پاريج وليمپياداسىندا سپورتتىق قۇزعا ورمەلەۋ سايىسىنىڭ «جىلدامدىق» ديستسيپليناسىندا تابىستى ونەر كورسەتتى. ونىڭ العاشقى ىرىكتەۋ كەزەڭىندە 4.89 ۋاقىت كورسەتكىشىمەن وليمپيادا رەكوردىن جاڭارتۋى كوپشىلىكتىڭ وسى سپورتقا قىزىعۋشىلىعىن ءسوزسىز ارتتىردى, دەپ جازادى Egemen.kz.
ءامىر مايمۇراتوۆ ەكىنشى مۇمكىندىگىندە اياعى تايىپ ءبىرشاما ۋاقىت وزدىرىپ العانمەن, قورىتىندى ەسەپتە وليمپيا ويىندارىن بەسىنشى ورىندا اياقتادى.
سپورتشى ءدۇبىرلى دودادا قولداۋ بىلدىرگەن حالىققا العىسىن ءبىلدىرىپ, سپورتتىق قۇزعا ورمەلەۋ قابىرعالارىن سالۋ ءۇشىن ينۆەستورلار نازارىن اۋداردى.
«مەنى قولداعان بارلىق جۇرتشىلىققا, حالقىما شىن جۇرەكتەن راقمەتىمدى ايتامىن. وسى وليمپياداعا بارۋىما اتسالىسىپ, قولداۋ كورسەتكەن الپينيزم جانە سرورتتىق قۇزعا ورمەلەۋ فەدەراتسياسىنىڭ توراعاسى نۇرسۇلتان نۇرلان ۇلىنا العىسىم شەكسىز! ءوزىمنىڭ العاشقى باپكەرىم سلۋتسكايا كلارا مينيحانوۆناعا مەنەن سپورتشىعا ءتان قابىلەتتەردى تانىپ, سەنىم ارتقانىنا راقمەتىمدى ايتامىن. قولداۋشىلار مەن جانكۇيەرلەر وتە كوپ بولدى. سىزدەرگە باسىمدى يەمىن.مەنىڭ وليمپيادا ويىندارىنداعى ونەر كورسەتۋىم بۇكىل ەل بويىنشا سپورتتىق قۇزعا ورمەلەۋ قابىرعالارىنىڭ قۇرىلىسىنا ينۆەستورلاردىڭ نازارىن اۋدارادى جانە كوپتەگەن بالالاردى سپورتتىق قۇزعا ورمەلەۋ سەكتسيالارىنا تارتادى دەپ سەنگىم كەلەدى», دەپ ءجازدى امىر مايمۇراتوۆ الەۋمەتتىك جەلىدەگى پاراقشاسىندا.