امەريكالىق ينۆەستور روبەرت كيوساكي «اقشا – بيلىكتىڭ ءبىر ءتۇرى, بىراق قارجى ساۋاتى ودان دا قۇدىرەتتى كۇش» دەيدى. اقشانى ۇقىپتى ۇستاۋ, جيناۋ – كۇللى ادامزات قالاۋى شىعار. دەگەنمەن دە بەلگىلى ءبىر قيىندىقتارعا ءجيى تاپ بولىپ جاتامىز. بۇل ماسەلە نۇرداۋلەتتى دە الاڭداتقان. اقىرى ويلانا كەلە, ول قارجىنى قاداعالايتىن «Kiris-Shyğys» قوسىمشاسىن جاساعان.
نۇرداۋلەت ابدىكايىموۆ استانادا تۇرادى. «Astana IT University»-ىندە ينجەنەر-باعدارلاماشى ماماندىعىندا وقيدى. قاتارلاستارىنىڭ, ءوزىنىڭ, اينالاسىنداعى ادامداردىڭ اقشانى ساۋاتتى ۇستاي المايتىنىن تۇسىنگەن ول وسى تاقىرىپتى زەرتتەي باستاعان. زەرتتەي كەلە, ەڭ دۇرىسى, كىرىس-شىعىستى جازىپ وتىرۋ دەگەن شەشىمگە كەلگەن. سولاي شىعىن مەن كىرىستى باقىلاپ وتىراتىن, سونداي-اق وسى كورسەتكىشتەر بويىنشا وتكەن ايداعى ستاتيستيكانى كورسەتەتىن قوسىمشا جاساعان.
– ەگەر ءسىز قارجىلاي داعدارىس پەن كۇتپەگەن جاعدايدان ساقتانعىڭىز كەلسە, شىعىندارىڭىزدى جوسپارلاۋ مەن قاداعالاۋدىڭ ماڭىزىن اتاپ وتكىم كەلەدى. بۇل ويىن-ساۋىق پەن دەمالىستان مۇلدەم باس تارتۋ دەگەن ءسوز ەمەس. تەك شىعىس-كىرىستى باقىلاۋ كەرەك. بۇل ىستە ءبىراز قينالدىم, سوندىقتان دا جاعدايدى باقىلاۋعا الاتىن قوسىمشانى جاسادىم, – دەيدى تالاپتى جىگىت.
نارىقتا مۇنداي قوسىمشالار كوپ. ءتۇر-ءتۇرى بار. ءبارى اقىلى. ودان كەيىن وتاندىق ءارى قازاق تىلىندەگىسى جوق دەسەك تە بولادى. سوندىقتان دا حالىققا پايدالى بولۋ ءۇشىن انا تىلىمىزدە قىزمەت كورسەتەتىن قوسىمشا جاساعان. ءارى تەگىن.
قوسىمشانىڭ قازاق تىلىندە بولۋىنا نۇرداۋلەت باسا ءمان بەرگەن. «انا تىلىمدە بولۋى – مەنىڭ ۇستانىمىم», دەدى ول. نيەتىنە سۇيسىندىك. دەگەنمەن ول وزگە تىلدەگى پايدالانۋشىلاردى دا ەسكەرۋسىز قالدىرماعان. ورىس نەمەسە اعىلشىن ءتىلىن دە تاڭداۋعا بولادى.
– 2023 جىلدىڭ قاراشاسىندا نارىقتى زەرتتەي باستاعان كەزدە جاسايمىن دەپ بەل بۋدىم. انالوگتەردىڭ كوپشىلىگىندە جازىلىمنان كەيىن عانا نەگىزگى مۇمكىندىك بار ەكەنىن ءتۇسىندىم. پايدالانۋشىلارعا تەگىن نۇسقادا تولىق فۋنكتسيونالدىلىق بەرگىم كەلدى. ديزايندى ءداستۇرلى قازاق ستيلىمەن بايلانىستىردىم. جىلۋلىق پەن جايلىلىق سەزىمىن تۋدىراتىن اقشىل قوڭىر ءتۇستى تاڭدادىم. دەمو ءبىر ايدا دايىن بولدى. ايتپاقشى, باسىنان باستاپ «App Store» دۇكەنىندە قوسىمشانى شىعاراتىنىمدى ءبىلدىم. باسىندا ءبىراز قيىندىق بولدى. قازىر قوسىمشا كوپشىلىكتىڭ كوڭىلىنەن شىعىپ, جۇمىس ىستەپ تۇر, – دەدى جوبا اۆتورى.
قوسىمشانىڭ فۋنكتسيونالدىعى ازىرگە شەكتەۋلى ەكەنىن مويىنداۋ كەرەك. سىناق مەرزىمىندە دەسەك تە بولادى. نۇرداۋلەت الداعى ۋاقىتتا جاڭا مۇمكىندىكتەرگە ەسىك اشىپ, ەرەكشە بولىمدەر قوسۋدى جوسپارلاپ وتىر. وعان «LinkedIn» جانە «TikTok»-تا پوست جاريالاعاننان كەيىن قاراپايىم ادامداردان دا, ازىرلەۋشىلەردەن دە جاقسارتۋ بويىنشا كوپتەگەن ۇسىنىس تۇسكەن. شىعىن ساناتتارىن قوسۋ, اۆتوماتتى جاڭارتۋ, ديزايندى جاقسارتۋ جوسپارلارى بار. ەگەر ءونىم ءوز اۋديتورياسىن تاۋىپ, نازار اۋدارتسا, ينۆەستيتسيا تارتپاق. سولاي ەلىمىزدىڭ قارجىلىق ساۋاتىن ارتتىرۋعا كىشكەنە بولسىن ۇلەس قوسپاق.