استانادا سالىنىپ جاتقان مەكتەپتەردىڭ سانى رەكوردتىق كورسەتكىشكە جەتتى. قازىرگى ۋاقىتتا 100 مىڭعا جۋىق وقۋشىعا ارنالعان 30-دان اسا مەكتەپتىڭ قۇرىلىسى ءجۇرىپ جاتىر.
ەلوردادا تۇرعىنداردىڭ, ونىڭ ىشىندە مەكتەپكە دەيىنگى جانە مەكتەپ جاسىنداعى بالالاردىڭ سانى جىل سايىن ارتىپ كەلەدى. وسىعان بايلانىستى استانا قالاسىنىڭ اكىمى جەڭىس قاسىمبەك الەۋمەتتىك جەلىدەگى پاراقشاسىندا الداعى وقۋ جىلىندا اشىلاتىن مەكتەپتەر تۋرالى جازدى. ول باس قالامىزدا بۇرىن-سوڭدى بولماعان كولەمدە مەكتەپتەر سالىنىپ جاتقانىن جەتكىزدى. ماسەلەن, «جايلى مەكتەپ» ۇلتتىق جوباسى اياسىندا Samruk-Kazyna Construction سالاتىن (2024-2025 جىلدارى) 90 مىڭ وقۋشىعا ارنالعان ەكى اۋىسىمدى 24 جايلى مەكتەپ بار.
– قالانى ارالاۋ بارىسىندا پرەمەر-ءمينيستردىڭ ءبىرىنشى ورىنباسارى رومان سكليارمەن بىرگە وقۋ جىلىنىڭ باسىندا اشىلاتىن جايلى مەكتەپتەرگە باردىق. بۇل سەگىز مەكتەپ مىنا مەكەنجايلاردا ورنالاسقان: سارىارقا اۋدانىندا ۇلىتاۋ مەن ناۋرىز كوشەلەرىنىڭ قيىلىسىندا, بەيبارىس سۇلتان كوشەسىندە, نۇرا اۋدانىندا تولە بي كوشەسى مەن 24-كوشەنىڭ قيىلىسىندا, ەسىل اۋدانىندا قابانباي باتىر داڭعىلى مەن سىعاناق كوشەسىنىڭ قيىلىسىندا, نۇرا اۋدانىندا تولە بي كوشەسى, 31 مەكەنجايىندا, ماڭگىلىك ەل داڭعىلى مەن E-497 كوشەسىنىڭ قيىلىسىندا, ورىنبور كوشەسى مەن №37 كوشەنىڭ قيىلىسىندا, الماتى اۋدانىندا ا.بايتۇرسىن ۇلى كوشەسىندە, – دەيدى ج. قاسىمبەك.
سونداي-اق وقۋ جىلىنىڭ باسىندا جوعارىدا اتالعان وقۋ ورىندارىنان باسقا تاعى ءۇش مەملەكەتتىك جانە ءبىر جەكەمەنشىك مەكتەپ اشۋ جوسپارلانىپ وتىر. سول سياقتى جىل سوڭىنا دەيىن 7 جايلى مەكتەپ, 5 مەملەكەتتىك جانە 3 جەكەمەنشىك مەكتەپ اشۋ جوسپاردا بار. وسىلايشا, جاڭا وقۋ جىلى بارىسىندا 23 مەكتەپتىڭ قۇرىلىسى اياقتالادى.