بوكستان قازاقستان كومانداسىنىڭ مۇشەسى ساكەن بيبوسىنوۆ پاريج وليمپياداسىنداعى جەڭىلىستەن سوڭ سۇحبات بەردى. بۇل تۋرالى Egemen.kz اگەنتتىگى Olympic.kz-كە سىلتەمە جاساپ حابارلايدى.
«وكىنىشكە قاراي, باستى قارسىلاسىمنان جەڭىلىپ قالدىم. وسى ويىندارعا التىن ءۇشىن كەلىپ ەدىم. بىراق قولا جۇلدە دە بۇيىرمادى.
شارشى الاڭدا بارىمدى سالدىم. بىراق تورەشى قولىمدى كوتەرگەن جوق. تورەشىلىككە قاتىستى ەشتەڭە ايتا المايمىن. مەن تەك رينگ ىشىندەگى جەكپە-جەككە جاۋاپ بەرەمىن.
قازاق ەلىنىڭ نامىسىن ابىرويمەن قورعاي المادىم. قاتەلىكتەر كەتتى. ەندى وسى كەمشىلىكتەرمەن جۇمىس ىستەيمىز», - دەيدى بيبوسىنوۆ.
ايتا كەتەيىك, ساكەن بيبوسىنوۆ پاريج وليمپياداسىنىڭ شيرەك فينالىندا وزبەكستاندىق حاسانباي دوسماتوۆتان جەڭىلىپ قالدى.