قىرعي – جاراتىلىسى قارشىعا تۇقىمداسقا جاتاتىن ادەمى قۇس. بىراق ول قارشىعادان كىشىرەك, جاعالتاي مەن تۇرىمتايدان ۇلكەنىرەك بولادى. ەلىمىزدىڭ تاۋلى ولكەلەرى التاي, تارباعاتاي, جەتىسۋ جەرىن مەكەندەيدى.
قىرعيدىڭ دەنەسى ۇلكەن, ءوزى جۇندەس, اق-كوك تۇستەس كەلەدى. باۋىرى اق شۇبار. جىلىنشىگى ۇزىن, قاناتى قۇلادىننىڭ قاناتى سياقتى.
جۋىقتا «اسبك» باسپاسىنان جارىق كورگەن «قازاقستان قۇستارى» اتتى عىلىمي انىقتامالىقتا «بۇل قۇستىڭ دەنەسىنىڭ جالپى ۇزىندىعى – 28-41 سم, قانات قۇلاشى – 64-80 سم, سالماعى – 100-340 گرامم», دەپ جازىلىپتى.
قىرعيدىڭ قارا تارلان دەگەن ءتۇرى بولادى. ونىڭ دەنەسى ورتاشا, ءبىتىمى ادەمى. سىرتقى جۇندەرى قوڭىر-كوك, باۋىرىنىڭ شۇبارى قارا تارلان كەلەدى. كوزى قىزىل شەگىر. قىرعيدىڭ قىرانى – وسى قارا تارلان.
قىرعيدىڭ ەندى ءبىر ءتۇرى قىزىل شۇبار دەپ اتالادى. بۇل – ەڭ كىشكەنەسى. سىرتقى جۇندەرىندە اق تاناداي تەڭبىلى بار. باۋىر ءجۇنى كوك شۇبار. سان جۇندەرى قىزىل شۇبار بولادى. قىرعيدىڭ وسى قىزىلىنان قىران شىعادى. دەنە تۇرعىسىنان: ءىرى, ورتاشا, كىشكەنە دەپ ۇشكە بولىنەدى.
وتاندىق ورنيتولوگتەردىڭ مالىمەتىنە جۇگىنسەك, قىرعي ناۋرىز جانە مامىر ايلارىندا ۇيا باسادى. جۇمىرتقاسىن 35 كۇندەي شايقايدى. بالاپان شىققان سوڭ ونى قورەكتەندىرۋ 50 كۇنگە سوزىلادى. كۇزدىڭ سوڭعى ايلارىندا جىلى جاققا ۇشىپ كەتەدى.