استانادا «مەكتەپكە جول» رەسپۋبليكالىق جارمەڭكەسى باستالدى

«مەكتەپكە جول» اكتسياسى اياسىندا وتەتىن ءداستۇرلى جارمەڭكەدە كەڭسە تاۋارلارى مەن مەكتەپ فورماسىن قولايلى باعامەن ساتىپ الۋعا بولادى.«1 تامىزدان 31 تامىزعا دەيىنگى ارالىقتا وتەتىن «مەكتەپكە جول» رەسپۋبليكالىق جارمەڭكەسى باستالدى. وتكەن جىلعى ءىس-شارا اياسىندا 8 مىڭنان اسا بالا مەكتەپكە دايىندىق جاساعان بولسا, بيىل 8,5 مىڭ بالانى قامتۋ جوسپارلانىپ وتىر.

«مەكتەپكە جول» اكتسياسى, نەگىزىنەن, دەمەۋشىلەردىڭ جانە مەتسەناتتاردىڭ قاراجاتى ەسەبىنەن جۇزەگە اسىرىلادى. بۇدان بولەك, ءبىزدىڭ جالپىعا بىردەي مىندەتتى بىلىممەن قامتۋ باعدارلاماسى اياسىندا جۇمىستار جۇرگىزىلىپ جاتىر. سونىڭ ناتيجەسىندە وتكەن جىلى حالىقتىڭ الەۋمەتتىك وسال توپتارىنا جاتاتىن 14 040 بالاعا اتالعان باعدارلاما اياسىندا كومەك كورسەتىلسە, بيىل 14 500 بالانى قامتۋدى جوسپارلاپ وتىرمىز. حالىقتىڭ الەۋمەتتىك وسال توپتارى ساناتتارىنا الەۋمەتتىك كومەك الاتىن وتباسى بالالارى, وتباسىنىڭ جان باسىنا شاققانداعى تابىسى ەڭ تومەنگى كۇن كورىس دەڭگەيىنەن تومەن, اتا-اناسىنىڭ قامقورلىعىنسىز قالعان بالالار, توتەنشە جاعدايلارعا تاپ بولعان بالالار جانە باسقالارى جاتادى. ەگەر وتباسى اتالعان ساناتتارعا جاتاتىن بولسا, وندا بالالاردىڭ اتا-انالارى مەكتەپكە بارىپ, راستايتىن قۇجاتتاردى ۇسىنۋى كەرەك. قازىرگى ۋاقىتتا مەكتەپتەردىڭ الەۋمەتتىك پەداگوگتەرى ءبىلىم الۋشىلاردىڭ جاڭا جيىنتىعىن ەسكەرە وتىرىپ, مۇقتاج بالالاردىڭ ءتىزىمىن قالىپتاستىرۋدا. 2024-2025 وقۋ جىلىندا ماتەريالدىق كومەكتىڭ مولشەرى ءبىر بالاعا 43 407 تەڭگەنى قۇرادى» , دەدى استانا قالاسى ءبىلىم باسقارماسىنىڭ باس مامانى قۇتتىمۇرات شامشيەۆ.

«ايماقتاۋ» ساۋدا ماڭىندا ورنالاسقان مەكتەپ جارمەڭكەسى كۇندەلىكتى تاڭەرتەڭگى ساعات 09.00-دەن كەشكى ساعات 20.00 ارالىعىندا 5 قىركۇيەككە دەيىن جۇمىس ىستەيدى.

ايتا كەتەيىك, مۇنداي مەكتەپ جارمەڭكەلەرى قالاداعى باسقا دا ءىرى ساۋدا ۇيلەرىندە ۇيىمداستىرىلماق.