قازاقستاندىقتار وزدەرىنىڭ دەربەس دەرەكتەرى كەز-كەلگەن ۋاقىتتا حاكەرلەردىڭ نىساناسىنا ىلىگۋى مۇمكىن ەكەنىنە دايىن بولۋى قاجەت. بۇل تۋرالى مەديتسينالىق تەحنولوگيالار جانە اقپاراتتىق جۇيەلەر ورتالىعىنىڭ (متاجو) اقپاراتتىق قاۋىپسىزدىك ماسەلەلەرى بويىنشا ساراپشى-ترەنەرلەرى مالىمدەدى.
ساراپشىلار ەلدى جەدەل تسيفرلاندىرۋ جاعدايىندا اقپاراتتى قورعاۋ ماسەلەسىنىڭ دە ماڭىزى ارتىپ, ءبىرىنشى كەزەككە شىعاتىنىن اتادى. جاڭا تەحنولوگيالار مەن سەرۆيستەردى ەنگىزۋ ازاماتتار مەن ۇيىمداردىڭ ءوز دەرەكتەرىن قورعاۋ قاجەتتىگىن تۇسىنۋىنەن الدەقايدا جىلدام ءجۇرىپ جاتىر.
ورتالىق بۇل رەتتە اقپاراتتىق قاۋىپسىزدىك دەڭگەيىن ارتتىرۋعا ارنالعان بىرقاتار كەڭەس ۇسىنادى:
كوپفاكتورلى اۋتەنتيفيكاتسيانى (كفا) ورناتۋ جانە قولدانۋ. كفا ەكىنشى كانال, مىسالى, SMS نەمەسە قولدانبا-اۋتەنتيفيكاتور ارقىلى قوسىمشا راستاۋدى تالاپ ەتىپ, قاۋىپسىزدىكتى كۇشەيتەدى. بۇل الاياقتاردىڭ جۇمىسىن ايتارلىقتاي قيىنداتادى. قوعامدىق Wi-Fi جەلىلەرىنە قوسىلعاندا VPN پايدالانۋ. قوعامدىق Wi-Fi جەلىلەرىنە قوسىلعان جاعدايدا VPN قولدانىڭىز. بۇل ءسىزدىڭ دەرەكتەردى اسىرەسە ونلاين ساتىپ الۋ نەمەسە بانك ەسەپشوتتارىنا قولجەتىمدىلىك بەرۋ كەزىندە باسقالاردىڭ ءبىلىپ قويۋىنان قورعايدى. بەكاپ جانە دەرەكتەردى قالپىنا كەلتىرۋ. دەرەكتەردىڭ رەزەرۆتىك كوشىرمەلەرىن تۇراقتى قۇرۋ جانە قالپىنا كەلتىرۋ جوسپارلارىن تەكسەرىپ وتىرۋ – قاۋىپسىزدىكتىڭ ىرگەلى شارالارى بولىپ تابىلادى. اپات جاعدايلارىندا دەرەكتەردى جوعالتۋدان اباي بولۋ ءۇشىن كوشىرمەلەردى ءتۇرلى اقپارات تاسىمالداعىشتاردا جانە ءارتۇرلى جەردە ساقتاۋ ماڭىزدى. قۇپياسوزدەر مەنەدجەرىن پايدالانۋ. قۇپياسوز مەنەدجەرلەرى ءاربىر اككاۋنت ءۇشىن بىرەگەي ءارى قيىن قۇپياسوزدەر قۇرۋعا جانە ولاردى ساقتاۋعا مۇمكىندىك بەرەدى. بۇل ءبىر قۇپياسوزدى ءارتۇرلى سايتتا قولدانۋ تاۋەكەلىن ازايتادى. بۇل اسىرەسە فيشينگ قاۋپى تونگەن جاعدايلاردا ماڭىزدى. قاۋىپسىزدىك تۋرالى ەسكەرتۋلەردى ەلەۋسىز قالدىرماڭىز. ەگەر براۋزەر نەمەسە ۆيرۋسقا قارسى باعدارلاما كۇدىكتى سايت نەمەسە باعدارلاما تۋرالى ەسكەرتۋ جاساسا, ونى ەلەمەي ءوتىپ كەتپەڭىز. اباي بولىپ, ىقتيمال قاۋىپتىڭ الدىن العان دۇرىس.ساراپشىلار اقپاراتتىق قاۋىپسىزدىك تۇراقتى نازار اۋدارۋدى جانە ونى كۇشەيتىپ وتىرۋدى قاجەت ەتەتىنىن ايتىپ ءسوزىن تۇيىندەدى:
ء«بىزدىڭ ءاربىرىمىز دەرەكتەردى قورعاۋ – ۇزدىكسىز پروتسەسس ەكەنىن ءتۇسىنۋىمىز كەرەك, ول ءبىلىمدى جانە سول ءبىلىمدى ۇدايى جاڭارتىپ وتىرۋدى, سونداي-اق زاماناۋي تەحنولوگيالاردى قولدانۋدى قاجەت ەتەدى».
متاجو ورتالىعىندا اقپاراتتىق قاۋىپسىزدىككە ارنالعان وقۋ شاراسى ىسكە قوسىلدى. ورتالىق 12 جىلدان بەرى قر پرەزيدەنتى ءىس باسقارماسى جۇيەسىنىڭ جانە وزگە دە ۇيىمداردىڭ قىزمەتكەرلەرىن وقىتۋمەن اينالىسادى. وسى ۋاقىت ارالىعىندا مۇندا 17 مىڭنان استام ادام وقىپ, ءبىلىم الدى.