«قازاقستان رەسپۋبليكاسىنداعى مەرەكەلەر تۋرالى» زاڭعا سايكەس ءبىزدىڭ ەلدە ۇلتتىق, مەملەكەتتىك, كاسىبي جانە وزگە دە مەرەكەلەر اتاپ وتىلەتىنى بەلگىلى. وسىنىڭ ىشىندە ۇلتتىق ءھام مەملەكەتتىك مەرەكەلەر ارنايى ءىس-شارالارمەن رەسپۋبليكا دەڭگەيدە قامتىلادى. ال كاسىبي مەرەكەلەردىڭ ءجونى بولەك. مەملەكەتتىك مەرەكەلەر مارتەبەسى بەرىلمەگەنمەن, بۇل – اتى ايتىپ تۇرعانداي, ءار كاسىپتىك سالادا ەڭبەك ەتىپ جۇرگەن ازاماتتاردىڭ اتاپ وتەتىن ارنايى كۇنى. دەمەك, مۇنداي ارناۋلى كۇندە ارىپتەستەرىڭىزدى, تانىستارىڭىز بەن جاقىندارىڭىزدى قۇتتىقتاۋعا ابدەن بولادى. قوش, الداعى جەكسەنبى, ياعني 28 شىلدە – ساۋدا قىزمەتكەرلەرى كۇنى. كاسىبي مەرەكەنىڭ ۋاقىتى وزگەرمەلى, ويتكەنى جىل سايىن شىلدەنىڭ ءتورتىنشى جەكسەنبىسىنە بەلگىلەنگەن.
مەرەكە تاريحى ىلگەرىدە جاتىر. دەرەكتەرگە سۇيەنسەك, كەڭەستىك كەزەڭدە ساۋدا, تۇرمىستىق قىزمەت كورسەتۋ جانە كوممۋنالدىق شارۋاشىلىق قىزمەتكەرلەرىنىڭ كۇنى بولدى. 1966 جىلدان باستاپ شىلدە ايىنىڭ سوڭعى جەكسەنبىسىندە اتالىپ وتكەن. ال 1988 جىلى ناۋرىزدىڭ ءۇشىنشى جەكسەنبىسىنە كوشىرىلگەن. تاۋەلسىز قازاقستان تاريحىندا بۇل كاسىبي مەرەكە ساۋدا جانە ينتەگراتسيا مينيسترلىگىنەن بۇرىن قۇرىلعان. 2017 جىلى 31 قازاندا ۇكىمەتتىڭ №689 قاۋلىسىمەن شىلدەنىڭ سوڭعى دەمالىسى – ساۋدا قىزمەتكەرلەرىنىڭ كۇنى بولىپ بەلگىلەنگەن. بيىل كاسىبي مەرەكە 28 شىلدەگە سايكەس كەلىپ وتىر. دەمەك 2018 جىلدان بەرى سالا قىزمەتكەرلەرى مەرەكەنى 7-رەت قاتارىنان اتاپ وتپەكشى. سونداي-اق بۇل مەرەكە تمد ەلدەرىندە دە بار. مىسالى, بەلارۋس پەن ۋكراينادا شىلدەنىڭ سوڭعى جەكسەنبىسىنە كەلەدى.
ساۋدا – ەكونوميكانىڭ ماڭىزدى سالاسى. اتالعان سالا مەملەكەت بيۋدجەتىنە تۇسەتىن سالىقتىڭ كوپ بولىگىن قامتىپ وتىر. ءارى جۇمىسسىزدىققا توسقاۋىل قويۋدا دا وتە ماڭىزدى ءرول اتقارادى. ساۋدا جانە ينتەگراتسيا مينيسترلىگى بەرگەن مالىمەتكە سۇيەنسەك, ەلىمىزدەگى ساۋدا سالاسىندا 1,5 ميلليوننان اسا ادام قىزمەت ەتەدى. سونداي-اق 80 مىڭعا جۋىق ساۋدا نىسانى بار. بۇنىڭ ىشىندە 700-دەن استامى – ءتۇرلى ساۋدا بازارلارى.
«2019 جىلى قۇرىلعان ساۋدا جانە ينتەگراتسيا مينيسترلىگى 5 جىل ىشىندە اۋقىمدى جەتىستىكتەرگە قول جەتكىزدى. وسى ارالىقتا ىشكى ساۋدا اينالىم 60 پايىزعا ارتسا, سىرتقى تاۋار اينالىم 43 پايىزعا ءوستى. تاۋارلار ەكسپورتى بىلتىر 35 پايىزعا ۇلعايدى. سونداي-اق ۇلتتىق ساۋدا سەكتورىن دامىتۋدا ايتارلىقتاي جەتىستىكتەرگە يە بولدىق. اۋقىمدى جۇمىستار ناتيجەسىندە ەاەو-عا مۇشە مەملەكەتتەردە سالاداعى كوپتەگەن كەدەرگى جويىلدى. بۇل حالىقارالىق ساۋدادا مارتەبەمىزدى جوعارىلاتىپ, ەكونوميكالىق بايلانىستاردى كەڭەيتۋگە ىقپال ەتتى. 2019 جىلدان باستاپ قازاقستاندىق كومپانيالار ەكسپورت ارقىلى Alibaba, Wildberries سەكىلدى حالىقارالىق ەلەكتروندىق الاڭدارعا شىعا باستادى. اتالعان باستاما جاڭا جۇمىس ورىندارىن كوبەيتىپ, بۇگىنگى نارىققا شىعۋعا مۇمكىندىك بەردى», دەيدى مينيسترلىككە قاراستى ساۋدا كوميتەتىنىڭ توراعاسى ايدار ابىلدابەكوۆ.
توراعانىڭ سوزىنشە, ەلىمىز يران, سينگاپۋر جانە سەربيامەن ماڭىزدى ەركىن ساۋدا كەلىسىمدەرىن جاساعان. بۇل ەل بويىنشا ەكسپورتتاۋشىلار مەن يمپورتتاۋشىلار ءۇشىن جاڭا مۇمكىندىك تۋعىزىپ وتىر. سونداي-اق قىتايمەن ساۋدا-ەكونوميكالىق ىنتىماقتاستىق تۋرالى كەلىسىمگە قول قويىلىپ, ءبىزدىڭ ەلىمىز الەمدەگى جەتەكشى ەكونوميكالىق ويىنشىلاردىڭ بىرىمەن قارىم-قاتىناسىمىزدى نىعايتۋعا ماڭىزدى قادام باسقانىن باسا ايتقان ءجون.
ساۋدا قىزمەتكەرلەرىنىڭ ماقساتى – حالىقتىڭ تاۋارلار مەن قىزمەتتەرگە سۇرانىسىن قاناعاتتاندىرۋ. راسىمەن دە, ءومىر ءسۇرۋ داعدىمىزدى دۇكەندەر مەن باسقا دا ساۋدا ورىندارىنسىز ەلەستەتۋ تىم قيىن. ادامزاتتىڭ ءتۇرلى قاجەتتىلىگىن وتەيتىن نىسانداردىڭ ماڭىزى ەرەكشە. ەكىنشىدەن, ساۋدا كاسىپورىندارى جىل سايىن دامىپ, زاماناۋي تەحنولوگيالىق قىزمەت كورسەتۋ ستاندارتتارىن ەنگىزىپ جاتىر. ويتكەنى تۇتىنۋشىلاردىڭ دا ءونىم مەن قىزمەت كورسەتۋگە قويىلاتىن تالاپتارى ارتقان.
ايتا كەتەيىك, كاسىبي مەرەكەدە سالا قىزمەتكەرلەرىن مينيسترلىك جانە وزگە دە مەملەكەتتىك قۇرىلىمدار قۇتتىقتايدى. جىل سايىن ولاردى ديپلوم جانە ارنايى سىيلىقپەن ماراپاتتاپ, قۇرمەت كورسەتىپ كەلەدى.