الىپ دومبىرا

جادىگەرگە جانار توقتاتىپ قارادىق: دومبىرانىڭ قۇلاقبۇراۋ قوندىراتىن ۇشار باسىندا اڭ ءبۇرىپ وتىرعان بۇركىت بەينەسى قاشالىپتى. قىران قۇس بەيمالىم ميستيكالىق جانۋاردىڭ قۇيقاسىن شەڭگەلدەپ وتىر. ۇزىن موينىنا 20 جەردەن پەرنە ورناتىپ, بەس جەرىنە سۇيەكتەن جونىپ جاساعان جاپىراق ويۋ شەكىتىلىپتى.

دومبىرانىڭ مويىنتۇعىرىنا باي-ولكەنىڭ گەر­بىسى قوندىرىلىپ, استىنا اق سامىر­سىندى شەڭ­بەر­لەپ ويىپ, ورتاسىنا جۇرەككوز ويۋ سالىپتى. جا­­دىگەردىڭ قاس­بەتىنىڭ قوس قاپ­­تالىن قا­زاق­­­تىڭ قوشقار ءمۇيىز ورنەگىمەن قاپتاعان. شا­ناقتىڭ تيەك ور­نا­لاسقان بولىگى­نىڭ ۇستىنە كىشكەنتاي سارى مىس تاقتا شەكىتىلىپتى. وعان «بۇل دومبىرانى مۋزەيگە ستام­بۋل ءابدىحان ۇلىنىڭ وتباسى سىيلادى. سالماعى – 100 كيلو, بيىكتىگى – 3 مەتر. ەردەنەت قا­لا­سىنىڭ تۇرعىنى, شەبەر چ.ەنح-وتگون جاسادى. 2014 جىل» دەپ جازىلعان ەكەن.

وسى تاقتادا ايتىپ, اتى اتالعان «ستام­بۋل ءابدىحان ۇلى» كىم دەگەنگە توقتالساق, بۇل ادام 1940 جىلى باي-ولكە جەرىندە تۋىپتى. ۇزاق جىل ەردەنەت كەن بايىتۋ وندىرىسىندە قاتارداعى شاحتەر, كەيىن الىپ ماشينا «بەلاز» كولىگىن جۇرگىزىپتى. 2001 جىلى موڭعوليا پرەزيدەنتىنىڭ جارلىعىمەن «ەڭبەك سىڭىرگەن ءوندىرىسشى» اتاعىن الىپتى. 2019 جىلى باقيعا اتتانعان. مارقۇم سوناۋ ءبىر قيىردا جۇرسە دە, تۋعان جەرىنە مىنا ءبىر جادىگەردى سىيلاپ كەتىپتى.