بۇگىن «بۋراباي» ۇلتتىق پاركىندە قازاقستانداعى ەڭ جوعارى تەحنولوگيالىق ينتەراكتيۆتى مۇراجايلاردىڭ ءبىرى, ابىلاي حان الاڭىندا ورنالاسقان مۋلتيمەديالىق ينتەراكتيۆتى كەشەن اشىلدى, دەپ حابارلايدى Egemen.kz.
كەشەننىڭ سالتاناتتى اشىلۋ راسىمىنە مادەنيەت جانە اقپارات ءمينيسترى ايدا بالاەۆا, اقمولا وبلىسى اكىمى مارات احمەتجانوۆ, پرەزيدەنت ءىس باسقارۋشىسىنىڭ ورىنباسارى رۋستام باياليەۆ جانە تاعى باسقالار قاتىستى. «بۋرابايدىڭ تۇمسا تابيعاتىن, تاريحي-مادەني بايلىعىن كوپشىلىككە تانىتۋ – وتە وزەكتى. بۇگىنگى زاماناۋي يننوۆاتسيالىق كەشەننىڭ اشىلۋى وسكەلەڭ ۇرپاقتى وتانسۇيگىشتىككە تاربيەلەۋدە ماڭىزدى قادامداردىڭ ءبىرى دەپ ەسەپتەيمىن. مۇندا جاستار ءوڭىردى عىلىمي-شىعارماشىلىق تۇرعىدان تەرەڭ زەردەلەپ, رۋحاني كەمەلدەنىپ, مول تاعىلىم الادى دەپ سەنەمىن», دەدى ايدا بالاەۆا.
مادەنيەت جانە اقپارات مينيسترلىگىنىڭ ءباسپاسوز قىزمەتىنىڭ مالىمەتىنشە كەشەن 2021 جىلى ىسكە قوسىلىپ, 3 جىلدان سوڭ تۇجىرىمداماسى قايتا قارالىپ, سوڭعى انيماتسيالىق جانە اۋديوۆيزۋالدى تەحنولوگيالاردى قولدانا وتىرىپ جاڭارتىلعان.
«كەشەننىڭ ابىلاي حان الاڭىندا ورنالاسقانى – ەرەكشە وقيعا. بۇل جەر ەلىمىزدىڭ كيەلى ورىندارىنىڭ تىزىمىنە كىرەدى جانە بۋراباي كۋرورتىنىڭ ەڭ باستى كوز تارتار ورنى. مۋلتيمەديالىق ورتالىق دەمالىس پەن ويىن-ساۋىق ورنى عانا ەمەس, سونىمەن قاتار مادەني پىكىر الماسۋ ورتالىعى بولاتىنىنا سەنەمىن», دەدى اقمولا وبلىسىنىڭ اكىمى مارات احمەتجانوۆ.
كەشەن ۇلى دالا مۇراسى, قازاقستانعا ساياحات, سامۇرىق قۇسىنىڭ ۇشۋى, باتىرلار دالاسى, ماڭگىلىك ەل, ۇلى دالا تاريحى, قازاقتىڭ تاريحي تۇلعالارى, ۋاقىت ءدالىزى, ابىلاي حان باتاسى دەپ اتالاتىن توعىز تاقىرىپتىق ايماققا بولىنگەن. بۇل ءاربىر كەلۋشىگە قازاق مادەنيەتىن سەزىنۋگە جانە ەل تاريحىمەن تانىسۋعا مۇمكىندىك بەرەدى. ايتا كەتسەك, ۆيزيت-ورتالىقتارعا جىل سايىن مىڭداعان ادام كەلەدى. ىلە-الاتاۋ ۇلتتىق ساياباعىنداعى تۇرگەنساي جانە شارىن شاتقالى سەكىلدى ەڭ تانىمال جەرلەردى جىلىنا 300 000 ادام تاماشالايدى. اتالعان ساندىق دەرەكتەر – سول جەرلەردىڭ ەرەكشەلىگىنەن بولەك, ەلدىڭ مادەني مول مۇراسىن ساقتاۋعا جانە ناسيحاتتاۋعا ىقپال ەتەتىن ينفراقۇرىلىمدى دامىتۋعا باعىتتالعان جۇمىستاردىڭ ناتيجەسىن كورسەتەدى.