الماتى قالاسىندا مەملەكەت جانە قوعام قايراتكەرى دىنمۇحامەد قوناەۆقا ارنالعان مۇرال سالىندى, دەپ جازادى Egemen.kz.
قالانىڭ الاتاۋ اۋدانىنداعى باۋىرجان مومىش ۇلى مەن موڭكە بي كوشەلەرى قيىلىسىنداعى 15-ءۇيدىڭ قابىرعاسىنا مۇرالدىڭ سالىنۋىنا «دىنمۇحامەد قوناەۆ» اتىنداعى حالىقارالىق قوردىڭ بەلدى مۇشەسى قالداربەك سمايىل ۇلى مۇرىندىق بولىپ, قابىرعا سۋرەتىنە جۇمسالعان قاراجاتتى دا ءوز قالتاسىنان شىعارعان.
ول مۇرال سالۋدى ءبىراز جىل بۇرىن جوسپارلاعانىمەن دەمەۋشىلەر تابىلماي, قوماقتى قاراجات جينالماعاندىقتان جۇزەگە اسۋى وڭايعا سوقپاعان. مەيىرجان وتىنشيەۆ ەسىمدى ازامات ءۇي كەرەگەسىن ورنەكتەۋگە جەرگىلىكتى اكىمدىكتەن رۇقسات الىپ بەرۋگە كومەكتەسسە, ق. سمايىل ۇلى ونىڭ ەسكيزىن, قالاي سالىناتىنىن وتباسىمەن بىرگە اقىلداسىپ شەشكەن.
ايتا كەتەيىك, سەگىز بالانىڭ اكەسى قالداربەك سمايىل ۇلى اتالعان يگى ىسكە دەيىن زاڭعار تۇلعانىڭ بەيىتىن تازالاپ, قورشاۋىن سىرلاپ, ونى بۇتىندەگەنى, كىتابىن قايتا باسقىزعانى, د.قوناەۆقا ارنالعان الامان بايگەگە ءوزىنىڭ اۆتوكولىگىن تىككەنى, ءوز قاراجاتىنا ەركىن كۇرەستەن تۋرنير وتكىزگەنى ءالى كۇنگە ەل ەسىندە.
دىنمۇحامەد احمەت ۇلى ەل باسقارعان جىلدارى كەڭ بايتاق دالامىزدا كوپتەگەن ءوندىرىس ورىندارىنىڭ ەسىگى اشىلىپ, ءىرى قۇرىلىس عيماراتتارى سالىنعانى ءمالىم. مۇرالدا سول كەزدە بوي كوتەرگەن 43 قالانىڭ ءاربىرى جەكە اتاۋمەن ايشىقتالعان ەكەن جانە ەلىن سۇيگەن ءبىرتۋار تۇلعانىڭ ناقىل ءسوزى جازىلىپتى.
سۋرەتتى ءوز ءىسىنىڭ شەبەرى جانىبەك جۇماعاليەۆ بەينەلەگەن. ەنى – 15 مەتر, بيىكتىگى – 12 مەترلىك مۇرال 5 كۇن ىشىندە سالىنعان ەكەن.