ەلورداداعى نۇرلى جول ۆوكزالىنان قازاقتىڭ العاشقى اكادەميك-گەولوگى قانىش ساتباەۆتىڭ 125 جىلدىعىنا وراي بەزەندىرىلگەن جولاۋشىلار پويىزى جولعا اتتاندى, دەپ حابارلايدى Egemen.kz.
«قانىش ساتباەۆتىڭ قىزمەتى جەزقازعان قالاسىمەن تىعىز بايلانىستى بولعاندىقتان №65/66 «استانا-جەزقازعان» باعىتىنداعى پويىز ارنايى راسىمدەلدى. راسىمدەلگەن پويىز كۇزدىڭ باسىنا دەيىن كۇنارا قاتىنايتىن بولادى», دەلىنگەن «جولاۋشىلار تاسىمالى» اق ءباسپاسوز قىزمەتىنىڭ حابارلاماسىندا.
قازاقتىڭ كورنەكتى قايراتكەرلەرىنە ارنالعان تاقىرىپتىق جوبانى ۇلتتىق تاسىمالداۋشى «قازاقمىس» كومپانياسىمەن بىرلەسىپ العاش رەت ىسكە اسىرىپ وتىر. پويىزدىڭ سىرتقى جاعىندا قانىش ساتباەۆتىڭ ءومىر سۇرگەن جىلدارى مەن ونىڭ مەرەيتويلىق پورترەتى بەينەلەنگەن. جوبا ۇلى قازاق عالىمىنىڭ ەسىمىن قاستەرلەۋگە باعىتتالعان.
قانىش ساتباەۆ ءىرى مىس, كومىر جانە باسقا دا پايدالى قازبالار كەن ورىندارىن اشىپ, ەلىمىزدىڭ ەكونوميكالىق دامۋىنا ەداۋىر ۇلەس قوسىپ, تاريحتا وشپەس ءىز قالدىرعان ۇلى تۇلعا.