سولتۇستىك قازاقستان ۋنيۆەرسيتەتىنىڭ كوللەدجى جابىلۋى مۇمكىن. وسىعان بايلانىستى 300-دەن استام ستۋدەنت ديپلومسىز قالۋى مۇمكىن, دەپ حابارلايدى Egemen.kz.
كوللەدج قۇرىلتايشىلارى ءبىلىم ورداسى جاڭا وقۋ جىلى قارساڭىندا جابىلاتىنىن مالىمدەگەن.
«دۇيسەنبى كۇنى جەتەكشىلەر مۇعالىمدەردى جيناپ, بۇل جاڭالىقتى ايتتى. كۋراتورلار بىزگە حات جازىپ قويعان ەدى. بۇل قالاي بولادى؟ بىرەۋگە ءبىر جىل, ەندى بىرىنە ەكى جىل وقۋ قالدى. ولاردىڭ ايتۋىنشا, ءبىز باسقا كوللەدجگە اۋىسا الامىز. بىراق مەن «اۋدارما ءىسى» ماماندىعى بويىنشا وقيمىن جانە بۇل ماماندىق تەك وسى كوللەدجدە عانا بار. ءۇش جىلدىق وقۋىمنىڭ ءبىر جىلى عانا قالعان ەدى. بۇدان ءارى نە ىستەيتىنىمدى بىلمەيمىن», دەدى كوللەدج ستۋدەنتى ياروسلاۆ دۋبروۆين.
تاعى ءبىر ستۋدەنت ءادىل اسىلبەكوۆ وتكەن جىلى زاڭگەر ماماندىعى بويىنشا وقۋعا تۇسكەن.
«ماعان مۇندا وقىعان ۇنايدى. كوللەدجدىڭ جابىلۋىنا قارسىمىن, وقۋىمدى اياقتاعىم كەلەدى», دەيدى ستۋدەنت.
ايتا كەتەيىك, كوللەدجدىڭ جابىلۋى تۋرالى اقپارات الەۋمەتتىك جەلىلەردە پايدا بولعان.
ستۋدەنتتەر مەن ولاردىڭ اتا-انالارى باسقا وقۋ ورىندارىنا اۋىسا المايتىنىن جەتكىزدى, سەبەبى قابىلداۋ كوميسسيالارى ءوز جۇمىسىن اياقتاپ قويعان. اشىنعان اتا-انالار جاعدايدى رەتتەۋ ءۇشىن كوللەدج عيماراتىنا بارعان.
كوللەدج ديرەكتورىنىڭ مىندەتىن اتقارۋشى بولات بايكەنوۆتىڭ ايتۋىنشا, قازىر وقۋ ورنىندا 310 ستۋدەنت ءبىلىم الادى, بىراق كوممەرتسيالىق توپتار وتە از. ستۋدەنتتەردىڭ 80 پايىزى بيۋدجەتتىك نەگىزدە وقيدى, ال بۇل قۇرىلتايشىلارعا تابىس اكەلمەيدى.