تۇركىستان وبلىسىندا بىرنەشە كۇن بويى قىزىلشا اۋرۋىمەن كۇرەسكەن 10 جاستاعى وقۋشى قىز وبلىستىق اۋرۋحانادا كوز جۇمدى, دەپ حابارلايدى Egemen.kz.
ينفورمبيۋرو باعدارلاماسىنىڭ حابارلاۋىنشا, ىستىعى قاتتى كوتەرىلىپ, دەنەسى قىزارعان 10 جاستاعى قىزعا دارىگەر دياگنوزدى دۇرىس قويماعان. سونداي-اق دارىگەرلەر جاسوسپىرىمگە قولدانۋعا قارسى كورسەتىلىمى بار ءدارىنى ەگىپ جىبەرگەن.
«اۋرۋحاناعا جەدەل جاردەممەن بارعان قىزىمنىڭ دەنەسى ءبىر تاۋلىكتە ۇيگە قايتتى. ءۇش كۇن بۇرىن كىشكەنتاي جىبەكتىڭ ءمايىتىن جەر قوينىنا تاپسىردىق. قىزۋى 40 گرادۋسقا دەيىن كوتەرىلگەن قىزىمنىڭ دياگنوزىن دارىگەر العاشىندا ءدوپ باسىپ تابا المادى. قىزىمنىڭ تسەف-3 دارىسىنە اللەرگياسى بار دەپ قانشا ەسكەرتسەم دە دارىگەرلەر بالاما ەكپەنى سالىپ جىبەرگەن», دەيدى اناسى.
اناسىنىڭ سوزىنشە, اۋداندىق ورتالىق اۋرۋحانادا تەگىن بەرىلۋى ءتيىس پرەپاراتتار تابىلماعان سوڭ اينالاداعى دارىحاناعا بارعان. ايتقاندارىن اينىتپاي اپارىپ تۇرسا دا, دارىگەرلەر قىزدىڭ ءومىرىن ساقتاپ قالا الماعان. جانساقتاۋ بولىمىنە تۇسكەن 10 جاستاعى جىبەكتىڭ جاعدايى مەڭگەرۋشىنىڭ كەسىرىنەن تىپتەن كۇردەلەنىپ كەتتى دەيدى اكەسى.
ال اۋرۋحانا باسشىلىعى بۇل جاعداي بويىنشا ۇجىمدا ىشكى تەكسەرىس جۇرگىزىلىپ جاتقانىن ايتتى. كوميسسيا قۇرامىنا سىرتتان ەمەس, ءوز ماماندارى كىرىپتى. وسى رەتتە باس دارىگەر تەكسەرۋ ءادىل بولادى دەگەنگە سەنىمسىزدىك تانىتقان جاعدايدا قۇزىرلى ورگاندارعا ارىز جازۋعا بولاتىنىن ايتتى.
«پرەدنيزولون مەن اللەرگوسەپت انافيلاكتيكالىق شوك كەزىندە قولدانىلاتىن دارىلەر. ول مىناداي جاي بولىمشەدە بولمايدى. جۇمىس ءجۇرىپ جاتقاننان كەيىن بارلىعى 100 پايىز جاقسى بولادى دەپ ايتا المايمىن. كەمشىلىكتەر بار», دەيدى جەتىساي اۋداندىق ورتالىق اۋرۋحاناسىنىڭ باس دارىگەرى نۇرلان جولداسبەكوۆ.
ايتا كەتەيىك, بالانىڭ ولىمىنە قاتىستى قىزمەتتىك تەرگەۋ ءجۇرىپ جاتىر. تۇركىستان وبلىسى جەتىساي ورتالىق اۋداندىق اۋرۋحاناسىنىڭ باس دارىگەرى تەكسەرۋ قورىتىندىسى پوليتسياعا بەرىلەتىنىن ايتتى.