14 شىلدە كۇنى WBO/IBF تۇجىرىمدارى بويىنشا ورتا سالماقتاعى الەم چەمپيونى جانىبەك ءالىمحان ۇلىنىڭ كەزەكتى جەكپە-جەگى وتپەي قالدى. وعان وتانداسىمىزدىڭ جۇدىرىقتاسۋ الدىنداعى سالماق قۋ كەزىندە ەسىنەن تانىپ قالعانى سەبەپ بولعان. جانىبەك ءالىمحان ۇلىنىڭ قارسىلاسى اندرەي ميحايلوۆيچ بۇل وقيعاعا قاتىستى پىكىر ءبىلدىردى, دەپ جازادى Egemen.kz.
Sports.kz مالىمەتىنشە, اندرەي ميحايلوۆيچ قوس بەلبەۋ يەگەرىنىڭ جەكپە-جەك الدىندا اۋرۋحاناعا ءتۇسىپ قالۋىن «عاسىر وقيعاسىنا» تەڭەگەن. ول بۇل تۋرالى الەۋمەتتىك جەلىدەگى پاراقشاسىندا جازبا قالدىرعان.
«وسى ايقاس ءۇشىن 7000 ميل جولدى ارتقا تاستاپ كەلدىم. الايدا كۇتپەگەن جاعداي بولىپ, جەكپە-جەكتىڭ بولماي قالعانى, ارينە, وكىنىشتى. بۇل عاسىر وقيعاسى بولدى. امال جوق كونەمىز. سىزدەردىڭ سۇيىسپەنشىلىكتەرىڭىزگە العىس بىلدىرەمىن. وسى ءبىر كەلەڭسىزدىكتى ەڭسەرۋگە سىزدەر كومەكتەسەسىزدەر», دەپ جازدى اندرەي ميحايلوۆيچ.
بۇعان دەيىن جانىبەك ءالىمحان ۇلىنىڭ جاي-كۇيىنە قاتىستى اقپارات ۇسىنعان ەدىك.