ماڭعىستاۋ اۋدانىنىڭ ورتالىعى شەتپەدە دارىگەرلەر وتباسى جاڭا كلينيكا اشىپ, اۋدان تۇرعىندارىنىڭ دەنساۋلىعىن قورعاۋعا, ساقتاۋعا ۇلەس قوسپاق.
س.اسفەندياروۆ اتىنداعى قازۇمۋ تۇلەكتەرى, سالادا 11 جىل تاجىريبەسى بار ماماندار – جالپى تاجىريبەلىك دارىگەر, انەستەزيولوگ-رەانيماتولوگ, كارديولوگ جانايدار ابەۋوۆ پەن ونىڭ جۇبايى تەراپەۆت, فتيزياتر, فۋنكتسيونالدىق دياگنوستيكا دارىگەرى ايگەرىم بايزاقوۆا اشقان جاڭا ASU-MED كلينيكاسىندا كارديولوگ, نەۆروپاتولوگ, حيرۋرگ, تەراپەۆت, پەدياتر, ۋرولوگ دارىگەرلەرى كەڭەس بەرىپ, قابىلداۋ جۇرگىزەدى. بۇدان بولەك, فۋنكتسيونالدىق دياگنوستيكا كابينەتى, ونىڭ ىشىندە ەلەكتروكارديوگرامما, جۇرەكتى ۋلترادىبىستىق زەرتتەۋ, ارتەريالىق قان قىسىمىن 24 ساعات باقىلاۋ (سماد), جۇرەك ىرعاعىنىڭ بۇزىلىستارىن باقىلاۋ, (حولتەر ەكگ), باۋىر, كوكباۋىر, ءوت قابى, ۇيقى بەزى مەن بۇيرەكتى ۋلترادىبىستىق زەرتتەۋ بار.
تۇرعىندار كۇندىزگى ەمدەۋ بولىمىنەن ەم قابىلداپ, ارنايى ەم-شارا بولمەسىنەن قاجەتتى ءدارى-دارمەكتەرىن سالعىزا الادى. كلينيكا جانىندا لابوراتوريا مەن ءدارىحانا دا بار.
جاڭا كلينيكانىڭ اشىلۋى 37 مىڭعا جۋىق تۇرعىنى بار اۋدانعا الەۋمەتتىك قولداۋ بولارى انىق.
ماڭعىستاۋ وبلىسى