مەملەكەت باسشىسى قاسىم-جومارت توقاەۆتىڭ باستاماسىمەن ەل كولەمىندە «تازا قازاقستان» ەكولوگيالىق اكتسياسى ءوتىپ جاتقانى بەلگىلى. جۇرت بولىپ جۇمىلا كىرىسكەن جۇمىس بۇگىندە شىن مانىندە ەلدىك سيپاتى بار يگى ىسكە اينالىپ ۇلگەردى. سونىڭ ءبىر كۋاسى – «يگى ىستەر مارافونى» جوباسى.
مادەنيەت جانە اقپارات مينيسترلىگى «ۇلتتىق ۆولونتەرلەر جەلىسى» زتب-مەن بىرلەسىپ, 9–14 شىلدە ارالىعىندا ەكولوگيا اپتالىعىن وتكىزۋدى قولعا الدى. جوبا ەرىكتىلەر مەن قوعامدىق ۇيىمداردىڭ اتسالىسۋىمەن وتەدى. قازىر جوبا اياسىندا ەلىمىزدىڭ بارلىق وڭىرىندە ەكولوگيالىق اپتالىق ءارتۇرلى تاقىرىپتا جالعاسىپ جاتىر. «يگى ىستەر مارافونى» – كۇنتىزبەدەگى ماڭىزدى داتالارعا, حالىقارالىق جانە ءتۇرلى الەۋمەتتىك مادەني تاقىرىپتارعا ارنالعان «ىزگىلىك اپتاسىن» داستۇرگە اينالدىرۋعا جوسپارلانعان.
«مۇنداي يگى ىستەرگە ارنالعان اپتالىقتىڭ اتاۋى جىل سايىن وزگەرىپ وتىرادى. بۇل الەۋمەتتىك جاۋاپكەرشىلىكتىڭ ءتۇرلى سالاسىنا قىزىعۋشىلىقتى ارتتىرا وتىرىپ, وزەكتى ماسەلەلەردىڭ الۋان تۇرلىلىگى مەن كەڭ اۋقىمىن قامتيدى. «يگى ىستەر مارافونىنىڭ» وسى اپتاسى ەكولوگياعا ارنالادى. جوباعا قاتىسۋ ءۇشىن جاساعان يگى ءىس تۋرالى الەۋمەتتىك جەلىلەردە اقپارات جاريالاپ, Qazvolunteer.kz ونلاين پلاتفورماسىندا تىركەۋدەن ءوتۋ قاجەت», دەيدى ۇيىمداستىرۋشىلار.
مارافون قورىتىندىسى بويىنشا ەڭ بەلسەندى قاتىسۋشىلار ماراپاتتالادى. راسىندا, بۇل بىررەتتىك ناۋقان ەمەس, حالىق مادەني ساناسىن قالىپتاستىراتىن كرەاتيۆتى يدەيا. اسىرەسە بۇل باستامانىڭ قوعامعا, قورشاعان ورتاعا دەگەن ۇلكەن قامقورلىق ەكەنىن تۇسىنۋگە بولادى.