بالىق براكونەرلىگى تىيىلماي تۇر

زاڭسىز بالىق اۋلاعان 694 ادام جاۋاپقا تارتىلدى

رەسمي دەرەك بويىنشا «بەكىرە-2024» كەڭ اۋقىمدى بالىق قور­عاۋ اكتسياسى بارىسىندا 1 ساۋىردەن 31 مامىرعا دەيىن اتىراۋ جانە ماڭعىستاۋ وبلىس­تارى ۇقك شق دەپارتامەنتتەرىنىڭ شەكا­رالىق كەمەلەرى, قايىقتارى جانە جاعالاۋ بولىمشەلەرىمەن بالىق اۋلاۋ­دىڭ بەلگىلەنگەن رەجىمدەرى مەن ەرەجەلەرىن بۇزعان 69 شاعىن كولەمدى ءجۇزۋ قۇرالى الىنىپ, 166 ادام ۇستالدى.

ۇقك شەكارا قىزمەتى شەكارانى كۇزەتۋ دەپارتامەنتىنىڭ كونسۋلتانتى سابىر حاسانوۆتىڭ ايتۋىنشا, 297 شاقىرىمعا جۋىق زاڭسىز بالىق اۋلاۋ قۇرالدارى (اۋ) تاركىلەنگەن. 7,5 ملن تەڭگەگە جۋىق اكىمشىلىك ايىپپۇل سالىنسا, ال مەملەكەتكە كەلتىرىلگەن زالال شامامەن 2,5 ملرد تەڭگە بولعان.

«تابيعاتتى قورعاۋ ورگاندارى كاس­پي تەڭىزىنىڭ ەلىمىزگە تيەسىلى بولى­گىنىڭ ۇلتتىق جانە ەكونوميكالىق مۇددەلەرىن قورعاۋ ءۇشىن بىرلەسكەن قىز­مەتىن كۇندەلىكتى قالىپتاسقان رەجىمدە جالعاستىرىپ جاتىر. نەگىزگى ءىس-شارالار تەڭىز كەڭىستىگىندەگى شەكارا قىزمەتى بارىسىندا جۇزەگە اسىرىلادى. شەكارا قىزمەتى جانۋارلار دۇنيەسىنىڭ ءوسىمىن مولايتۋ ماقساتىندا ءتيىستى ءىس-شارالار قولدانىپ وتىرادى», دەيدى س.حاسانوۆ.

بيىل 28 ناۋرىزدا اۋىل شارۋا­شىلىعى مينيسترلىگى, ىشكى ىستەر مينيسترلىگى, ۇلتتىق قاۋىپسىزدىك كو­ميتەتى بىرلەسىپ اتىراۋ, ماڭعىستاۋ, باتىس قازاقستان وبلىستارىنىڭ بە­كىرە جانە باسقا دا بالىق تۇرلەرىنىڭ ۋىلدىرىق شاشۋ كەزەڭىن وتكىزۋ تۋرالى بۇيرىققا قول قويعان ەدى. قۇجاتتا تابيعات قورعاۋ جانە قۇقىق قورعاۋ ورگاندارىنىڭ بىرلەسكەن ءىس-قيمىل جوسپارى بەكىتىلگەن. وسىدان كەيىن ءبىراز زاڭسىزدىقتىڭ بەتى اشىلعان. ماسەلەن, اكتسيانى وتكىزۋ كە­زەڭىندە جايىق-كاسپي وبلىسارالىق با­لىق شارۋاشىلىعى باسسەيندىك ينسپەك­تسياسىنىڭ ينسپەكتورلارى قۇقىق قور­عاۋ, تابيعات قورعاۋ ورگاندارى, ۇقك شەكارا قىزمەتىنىڭ ماماندارىمەن بىرلەسىپ, 945 زاڭ بۇزىلۋىن انىقتاپ, جولىن كەسىپتى. ناتيجەسىندە, 694 ادام اكىمشىلىك جاۋاپكەرشىلىككە تارتىلعان.

«سيرەك كەزدەسەتىن جانە قۇرىپ كەتۋ قاۋپى تونگەن بالىق تۇرلەرىنە قاتىستى زاڭسىز ارەكەت جاساۋ فاكتىلەرى بويىن­شا 71 قىلمىستىق ءىس قوزعالدى. زاڭ بۇزۋشىلارعا 19,4 ملن تەڭگە ايىپپۇل سالىندى. زاڭسىز اينالىمنان 11 توننا 308 كگ بالىق, ونىڭ ىشىندە 2 توننا 229,5 كگ بەكىرە تۇقىمداس بالىقتار,

8 كگ 328 گرامم بەكىرە ۋىلدىرىعى, 162 بىرلىك بالىق اۋلاۋ قۇرالدارى, 44 سۋ كولىگى تاركىلەندى. وزەن ارناسى مەن تەڭىز اكۆاتورياسىن كۇندەلىكتى باقىلاۋ ناتيجەسىندە سۋ ايدىندارىنان جالپى ۇزىندىعى 300 كم-دەن اساتىن 1 416 زاڭسىز بالىق اۋلاۋ قۇرالدارى الىندى», دەدى اشم بالىق شارۋاشىلىعى كوميتەتىنىڭ وكىلى ايان باحيانوۆ.

اكتسيا بارىسىندا اتىراۋ وبلى­سىنىڭ قۇقىق قورعاۋ جانە تابيعات قورعاۋ ورگاندارى يساتاي, جىلىوي, قۇر­مانعازى اۋداندارى, «اقجايىق» مەملەكەتتىك تابيعي رەزەرۆا­تىنا قا­راس­تى كريمينوگەندىك نۇكتەلەردى انىق­تاپتى.بيىل ۋىلدىرىق شاشۋ كەزەڭى باستالعاننان بەرى باقىلاۋداعى سۋ ايدىندارىندا بالىق شارۋاشىلىعى كوميتەتىنىڭ وبلىسارالىق باسسەيندىك ينسپەكتسيالارى اكىمشىلىك قۇقىق بۇزۋشىلىق تۋرالى 848 حاتتاما جاساپتى. ونىڭ ىشىندە 134 ماتەريال اكىمشىلىك جاۋاپكەرشىلىككە تارتۋ بويىنشا 383-باپقا سايكەس سوتقا جىبەرىلگەن ەكەن.

«بالىق اۋلاۋ ەرەجەلەرىن ورەسكەل بۇزعان 5 ازاماتقا قۇقىق قورعاۋ ورگاندارى قىلمىستىق ءىس قوزعادى. بۇعان قوسا زاڭ بۇزۋشىلاردان مەملەكەت كىرىسىنە 2 784 توننا زاڭسىز اۋلانعان بالىق, 286 اۋلاۋ قۇرالى, سونداي-اق 16 ءجۇزۋ قۇرالى تاركىلەندى. 14 ملن تەڭگەدەن اسا قاراجات كولەمىندە ايىپپۇل سالىندى. 4,1 ملن تەڭگە بالىق رەسۋرستارىنا كەلتىرىلگەن زالال ءۇشىن تالاپ قويىلدى», دەدى اشم وكىلى.

كۇش بىرىكتىرگەن كۇرەس

قازىر مەملەكەت تاراپىنان قور­شاعان ورتانىڭ لاستاۋى مەن بيورەسۋرس­تاردى زاڭسىز الۋ ماسەلەسىنە ەرەكشە كوڭىل ءبولىپ وتىر. مەملەكەت باسشىسى دا با­لىق قورىن قورعاۋ ماقساتىندا براكونەرلىكپەن كۇرەستى كۇشەيتۋ تۋرالى تاپسىرماسى ۇمىتىلا قويماسا كەرەك-ءتى. وسى رەتتە ءىىم اكىمشىلىك پوليتسيا كوميتەتىنىڭ ەرەكشە تاپسىرمالارى جو­نىندەگى اعا ينسپەكتورى الىشەر جار­ماعامبەتوۆ جاۋاپتى سالانىڭ باعىت­تاعى قىزمەتى تۋرالى ايتىپ بەرگەن ەدى. اعا ينسپەكتوردىڭ ايتۋىنشا, ەلىمىزدىڭ بارلىق وڭىرىندە ۋىلدىرىق شاشۋ كەزەڭىن ءجىتى باقىلانىپ, ءارتۇرلى اكتسيالار وتكىزىلىپ كەلەدى.

«الايدا پوليتسيا قىزمەتكەرلەرى براكونەرلىككە قارسى كۇرەستەگى جۇمى­سىن تەك وسىنداي اكتسيالار اياسىندا عانا ەمەس, كۇندەلىكتى قىزمەتىندە دە اتقارادى. بۇل قاتاردا مينيسترلىك تاراپىنان تابيعاتتى قورعاۋعا ارنالعان ساقشىلار بار. براكونەرلىكتى جويۋ ماقساتىندا مەملەكەتتىك قۇزىرلى ورگاندار بىرلەسە شارا قولدانىپ وتىر», دەدى ول.

اۋىل شارۋاشىلىعى مينيسترلىگى مەن ەكولوگيا مينيسترلىگى قولدا­نىستاعى زاڭعا سايكەس براكونەرلىكپەن كۇرەس جۇمىسىنا كۇش بىرىكتىرمەك. بۇعان قوسا قازىر قىزمەتكەرلەردىڭ بىلىك­تىلىگىن ارتتىرۋ ماقساتىندا ىشكى ىستەر مينيسترلىگى باس پروكۋراتۋرا جا­نىنداعى قۇقىق قورعاۋ اكادەميا­سىمەن بىرلەسە تابيعاتتى قورعاۋ پوليتسيا قىزمەتكەرلەرىنە ترەنينگ وتكىزىپ جاتىر. بۇل ترەنينگتە بالىق شارۋا­شىلىعى قىزمەتكەرلەرى دە بار. ترەنينگكە بۇۇ ماماندارى دا قاتىسىپ, ءدارىس وقىپ, تاجىريبەلەرىن بولىسپەك.