7 شىلدە كۇنى نوسەر جاۋىننان كەيىن جامبىل وبلىسى جاڭاتاس قالاسىنداعى 400-دەن استام ءۇيدىڭ اۋلاسى, 47 ءۇيدىڭ ءىشى مەن 1 مەكتەپتىڭ جەرتولەسىن سۋ باسىپ قالدى, دەپ جازادى Egemen.kz.
وڭىردەگى توتەنشە جاعدايلار دەپارتامەنتى سۋ سورۋ جۇمىستارى جالعاسىپ, 8 شىلدە ساعات 18:00-دەگى جاعداي بويىنشا 128 اۋلا مەن 47 ءۇيدىڭ ءىشى سۋدان تازارتىلعانىن حابارلادى.
«جاڭاتاس قالاسىنداعى ەكى ەلدى مەكەن (مالوەتاجكا, دەگەرەس) جارىققا قايتا قوسىلدى. تەك «د. قوناەۆ» اتىنداعى ورتا مەكتەبىنە سۋدان تازارتۋ جۇمىستارىنىڭ جۇرگىزىلۋىنە بايلانىستى جارىق ءالى بەرىلمەدى. توتەنشە جاعداي سالدارىنان كەلتىرىلگەن ماتەريالدىق شىعىندى ەسەپتەۋ بويىنشا جۇمىس توبى قۇرىلدى. 8 شىلدە, تاڭەرتەڭ ۇشقىزسىز ۇشۋ اپپاراتىنىڭ كومەگىمەن سۋ دەڭگەيىنىڭ ەداۋىر تومەندەگەنى انىقتالدى. ادام, مال شىعىنى تىركەلمەگەن», دەلىنگەن وبلىس اكىمدىگىنىڭ حابارلاماسىندا.
نوسەر سۋىنان زارداپ شەككەندەر ءۇشىن 150 ادامدى قابىلداۋعا قاۋقارلى 2 قابىلداۋ پۋنكتى جابدىقتالدى.
توتەنشە جاعدايدى جويۋعا ازاماتتىق قورعاۋ قىزمەتتەرىنەن 282 ادام, 64 تەحنيكا, 35 موتوپومپا جانە 1 ۇشقىزسىز ۇشۋ اپپاراتى جۇمىلدىرىلعان.
ايتا كەتەيىك, قازىرگى ۋاقىتتا «جاڭاتاس–ساۋداكەنت» تاس جولى اشىق تۇر.