جەرگىلىكتى تۇرعىن استانا قالاسىنىڭ ازاماتتىق ىستەر جونىندەگى اۋدانارالىق سوتىنا جۇگىنىپ, جشس-نەن (قوناق ءۇي) جوعالتقان تابىسى مەن ماتەريالدىق شىعىندى ءوندىرۋ بويىنشا تالاپ قويعان. باسسەين جۇمىسىن قوناق ءۇي قىزمەتتەرىن كورسەتەتىن جشس جۇزەگە اسىرادى, دەپ حابارلايدى Egemen.kz.
جوعارعى سوتتىڭ مالىمەتىنشە, استانالىق كەلىنشەك قوناقۇي باسسەينىندە جاراقات الىپ, اياعى سىنعان. ول جاراقات العان ساتتەن باستاپ, ۇزاق ۋاقىت بويى ەمدەلگەن, وعان ۋاقىتشا ەڭبەككە جارامسىزدىق پاراعى اشىلعان.
قر ست 2985-2017 «حاۋىز قىزمەتتەرى» حالىققا قىزمەت كورسەتۋدىڭ ۇلتتىق ستاندارتىندا باسسەين قىزمەتتەرىن كورسەتۋ كەزىندە كەلۋشىلەردىڭ ءومىرى مەن دەنساۋلىعىنىڭ قاۋىپسىزدىگى جانە ولاردىڭ مۇلكىنىڭ ساقتالۋى قامتاماسىز ەتىلۋى ءتيىس. قىزمەتتەر قاۋىپسىزدىك شارالارىنا ساي بولۋى قاجەت.
سوتتا انىقتالعانداي, تالاپ قويۋشى باسسەين ايماعىنا ارنايى رەزەڭكە اياق كيىمسىز كىرگىزىلگەن.
«بۇل جاۋاپكەر كورسەتكەن قىزمەت ساپاسىنىڭ تومەندىگىن كورسەتەدى. سالدارىنان ونىڭ دەنساۋلىعىنا زيان كەلگەن. الايدا سوت زالال سوماسىن ازايتۋ قاجەت دەپ سانادى. سەبەبى قىزمەت الۋشى باسسەين اۋماعىندا تايعانامايتىن اياقكيىم كيۋگە قاتىستى ورەسكەل نەمقۇرايلىلىعى دەپ تانىلعان. ونداي اياق كيىم كيۋ كەرەكتىگى ەرەجەدە كوزدەلمەگەن», دەلىنگەن جوعارعى سوت حابارلاماسىندا.
سوت ماتەريالدىق زالالدى وتەۋ مولشەرىن تالاپ قويۋشىنىڭ كىناسىنىڭ دارەجەسىنە (50%) بارابار ازايتقان.
ايتا كەتەيىك, تالاپ قويۋ ءىشىنارا قاناعاتتاندىرىلدى. جشس-نەن تالاپ قويۋشىنىڭ پايداسىنا 1,1 ملن تەڭگە جوعالعان تابىس جانە 160 مىڭ تەڭگەدەن استام ءدارى-دارمەك جانە اۆيابيلەت ساتىپ الۋعا كەتكەن شىعىن وندىرىلگەن. جاۋاپكەردىڭ قىزمەت كورسەتۋ كەزىندە تالاپ قويۋشىنىڭ دەنساۋلىعىنا زيان كەلتىرۋدەگى كىناسى ءىشىنارا دەپ تانىلعاندىقتان, 50 مىڭ تەڭگە مورالدىق زياندى وتەۋ تۋرالى تالاپ ءىشىنارا قاناعاتتاندىرىلعان.
ۇكىم زاڭدى كۇشىنە ەنگەن جوق.