ەلىمىزدە ينتەرنەت الاياقتىق فاكتىلەرى بەلەڭ الا باستادى. قازاقستان ۇلتتىق بانكى Instagram الەۋمەتتىك جەلىسىندە national_bank_kazakhstan اتتى جالعان پاراقشا پايدا بولعانىن حابارلاپ, ەل ازاماتتارىن قىراعى بولۋعا شاقىردى, دەپ حابارلايدى Egemen.kz.
جەلىدە فەيك-پاراقشالاردى اشۋ ارقىلى الاياقتار فيشينگتىك حاتتار جىبەرۋدەن باستاپ ازاماتتاردىڭ جەكە دەرەكتەرىن نەمەسە قاراجاتىن جىمقىرۋدى كوزدەيتىن ءتۇرلى جىمىسقى ارەكەتتەرگە بارادى.
«ۇلتتىق بانكتىڭ دومەنىنە ۇقساس اتاۋلاردى قولدانا وتىرىپ, قاسكويلەر فيشينگتىك حاتتاردى جىبەرۋ ءۇشىن جالعان پوشتا اشادى. ونداي حاتتاردا, ادەتتە, جالعان سايتقا سىلتەمە بەرىلەدى نەمەسە تولەم جاساۋعا ارنالعان قۇجاتتار بولادى. سىلتەمەگە باسقان جاعدايدا پايدالانۋشىنىڭ ءموبيلدى قۇرىلعىسىن قاشىقتان باسقارۋعا نەگىزدەلگەن الاياقتاردىڭ زياندى باعدارلاماسى ىسكە قوسىلادى», دەلىنگەن حابارلامادا.
ۇلتتىق بانك جەكە تۇلعالاردىڭ شوتىنا قىزمەت كورسەتپەيتىنىن, ازاماتتاردىڭ قارجى قۇرالدارىن ساقتاندىرۋمەن اينالىسپايتىنىن, سونداي-اق حالىقپەن اقشالاي ەسەپ ايىرىسۋ وپەراتسيالارىن جۇرگىزبەيتىنىن ەسكە سالدى.