ۆيتسە-پرەمەر قانات بوزىمباەۆ تاراز وڭىرلىك ۋنيۆەرسيتەتى بازاسىندا جامبىل وبلىسىنداعى گيدرومەليوراتيۆتىك-قۇرىلىس ينستيتۋتىن قالپىنا كەلتىرۋ ماسەلەلەرى بويىنشا كەڭەس وتكىزدى, دەپ حابارلايدى Egemen.kz ۇكىمەتتىڭ ءباسپاسوز قىزمەتىنە سىلتەمە جاساپ.
وعان عىلىم جانە جوعارى ءبىلىم ءمينيسترى ساياسات نۇربەك, سۋ رەسۋرستارى جانە يرريگاتسيا, ۇلتتىق ەكونوميكا, ادىلەت ۆيتسە-مينيسترلەرى, سونداي-اق باسەكەلەستىكتى قورعاۋ جانە دامىتۋ اگەنتتىگى مەن جامبىل وبلىسى اكىمدىگىنىڭ باسشىلىعى قاتىستى.
جاڭا ۋنيۆەرسيتەتتىڭ ءتيىستى ماتەريالدىق-تەحنيكالىق بازاسىن قۇرۋ, قارجىلاندىرۋ جانە كادرلارمەن قامتاماسىز ەتۋ تۋرالى ەسەپتى تىڭداعان ۆيتسە-پرەمەر قانات بوزىمباەۆ ەلىمىزدىڭ بازالىق جوعارى وقۋ ورىندارىنىڭ ءبىرىن قالپىنا كەلتىرۋدى مەملەكەت باسشىسى تاپسىرعانىن ەسكە سالدى. ۋنيۆەرسيتەتكە ۇلتتىق مارتەبە بەرىلمەك, ول تەك سۋ رەسۋرستارى ماسەلەلەرىنە مامانداندىرىلادى. وقىتۋشىلار قۇرامىنا شەتەلدىك عالىمدار دا ەنەدى. ەۋروپا, قىتاي, رەسەي, اقش ۋنيۆەرسيتەتتەرىمەن جاڭا جوو-مەن سەرىكتەستىك تۋرالى كەلىسسوزدەر جۇرگىزىلىپ جاتىر. تالاپكەرلەردى تارتۋ ءۇشىن ءبىلىم بەرۋ گرانتتارى كوزدەلەدى.
ۆيتسە-پرەمەر قاجەتتى ۆەدومستۆوارالىق راسىمدەردى جەدەلدەتۋدى تاپسىردى, ۋنيۆەرسيتەت قىركۇيەك ايىندا اشىلۋى ءتيىس.