«ەگەمەننىڭ» ەلدەگى تىلشىلەرى شەتىنەن ەلگەزەك. جارعاق قۇلاعى جاستىققا تيمەي, ءوز وڭىرلەرىندەگى وزەكتى جاڭالىقتاردى جەدەلدەتىپ جالپاق جۇرتقا جەتكىزۋگە اسىعادى. ارىپتەستەرىمىز, ارينە, ءارتۇرلى تاقىرىپتا قالام تەربەيدى. ايتسە دە ولاردىڭ ارقايسىنىڭ وڭ جامباسىنا كەلەتىن, كەلىستىرىپ جازاتىن دۇنيەلەرى بولادى.
ماسەلەن, باتىس قازاقستان وبلىسىنداعى قالامداسىمىز قازبەك قۇتتىمۇرات ۇلى كونە تاريحتىڭ كومبەسىن اقتارۋعا قۇمار. جايىلىپ اققان جايىقتىڭ ارعى-بەرگى بەتىندە ول كورمەگەن وي-شۇقىر كەمدە-كەم. اراسىندا اناۋ ماڭعىستاۋداعى سۆەتقالي نۇرجان اعاسى سەكىلدى ەن دالانى ەركىن كەزىپ, ەسكى مولالارداعى قۇم باسقان قۇلپىتاستارداعى قۇپيا جازۋلاردى وقيتىن «وعاشتاۋ» ادەتى تاعى بار. ەل جادىنان شىعىپ, ەسكەرۋسىز قالعان ەرەك تۇلعالاردىڭ تالايىن قايتا ءتىرىلتتى.
بىلتىر كۇزدە ىسساپارمەن ورالعا بارعانىمىزدا, ەستى سوزگە ءۇيىر ەربولات قامەن ءىنىم ەكەۋمىزدى قاسيەتتى نارىننىڭ قالىڭ قۇمىن قاق جارىپ بوكەي ورداسىنداعى جاڭگىر بابامىزدىڭ باسىنا اپارعانى, جاسقۇستاعى «اينالاسى ايشىلىق, كولدەنەڭى كۇنشىلىك», «الپىس بولمە ءجۇز ەسىك» حان سارايىن ارالاعان ساۋلەلى ساتتەر ءسىرا, ەستەن كەتەر مە؟ باتىس الاشوردانىڭ بايراعىن جەلبىرەتكەن جىمپيتى جەرىندەگى جىلى جۇزدەسۋلەر دە ۇمىتىلا قويماسى انىق. جول بويى ەل, جەر, تۇلپار ءمىنىپ, تۋ ۇستاعان ەرلەر حاقىندا ايتقان اعىل-تەگىل اڭگىمەسى دە جادىمىزدا ءالى جاڭعىرىپ تۇر.
كەشە رەداكتسيامىزعا قۋانىشتى حابار جەتتى. قالامىمەن رۋحانيات كەنىن قازىپ جۇرگەن قازبەك قۇتتىمۇرات ۇلى وبلىس اكىمدىگىنىڭ ۇسىنۋىمەن «قۇرمەت» وردەنىمەن ماراپاتتالىپتى. بۇل بيىل «ەگەمەن» ەنشىسىنە تيگەن ەكىنشى «قۇرمەت». ءبىرىنشىسىن پرەزيدەنت قولىنان – وسى قازبەكتىڭ قازمۇۋ-دا بىرگە وقىعان كۋرستاسى ءايۇل احانبايقىزى الدى.
ەندەشە, ەكى ارىپتەسىمىزدىڭ دە جازارى كوبەيىپ, قالامىنىڭ سياسى كەپپەسىن!