الماتىدا قوعامدىق كولىكتە جول ءجۇرۋ اقىسىن 20 تەڭگەگە كوتەرىپ, قولما-قول تولەم اقىسىن الىپ تاستاۋ مۇمكىندىگى قاراستىرىلىپ جاتىر. قالا اكىمدىگى قاۋلىسىنىڭ ءتيىستى جوباسى تالقىلاۋ ءۇشىن «اشىق نقا» سايتىندا جاريالاندى, دەپ حابارلايدى Egemen.kz.
قالالىق موبيلدىلىك باسقارماسى 80 تەڭگەلىك تاريف 2011 جىلدان بەرى وزگەرمەگەنىن, تەك بىلتىر عانا 20 تەڭگەگە كوتەرىلگەنىن اتاپ ءوتتى. قازىر الماتىدا قوعامدىق كولىك ءتاريفىنىڭ قۇنى بانكتىك اۋدارىم ارقىلى تولەۋ كەزىندە 100 تەڭگە, قولما-قول تولەۋ كەزىندە 200 تەڭگە بولىپ بەلگىلەنگەن.
بۇل رەتتە باسقارما بيىلعى جىلى قوعامدىق كولىكتەردە جول ءجۇرۋ اقىسى ورتاشا ەسەپپەن 310 تەڭگەنى قۇراسا, كەيبىر باعىتتار بويىنشا 400 تەڭگەگە جەتكەنىن باسا ايتتى. وسىعان بايلانىستى تاسىمالداۋشىلارعا تولەنەتىن سۋبسيديا كولەمى جىل سايىن ارتىپ كەلەدى. 2023 جىلى 68,7 ملرد تەڭگە بولىنسە, 2024 جىلى سۋبسيديالاۋدىڭ بولجامدى كولەمى 97,3 ملرد تەڭگەگە دەيىن ءوستى.
«قالا تاسىمالداۋشىلارى قولدانىستاعى تاريف تاسىمالداۋشىلاردىڭ اۆتوبۋستاردى ساتىپ الۋعا, جاڭارتۋعا جانە ۋاقتىلى قىزمەت كورسەتۋگە, سونداي-اق جۇرگىزۋشىلەردىڭ جالاقىسىن كوتەرۋگە جۇمساعان شىعىندارىن وتەمەيتىنىن العا تارتتى. تاسىمالداۋشىلارعا جانە جەرگىلىكتى بيۋدجەتكە جۇكتەمەنى ءىشىنارا ازايتۋ ماقساتىندا قالالىق قاتىناستاردا جولاۋشىلار مەن باگاجدى اۆتوموبيلمەن تۇراقتى تاسىمالداۋعا تاريف بەلگىلەۋ تۋرالى قالا اكىمدىگى قاۋلىسىنىڭ جوباسى دايىندالدى. جوبا جول ءجۇرۋ ءتاريفىن 120 تەڭگەگە دەيىن كوتەرۋدى كوزدەيدى. تيىسىنشە, ازاماتتاردىڭ جەڭىلدەتىلگەن ساناتتارى ءۇشىن جول ءجۇرۋ قۇنى ءتاريفتىڭ 50 پايىزىن قۇرايدى», دەلىنگەن باسقارمانىڭ تاراتقان حابارلاماسىندا.
سونىمەن قاتار قوعامدىق كولىكتە جولاۋشىلاردىڭ قاۋىپسىزدىگىن قامتاماسىز ەتۋ ماقساتىندا قولما-قول اقشامەن تولەۋ اقىسى الىنىپ تاستالادى.