ماڭعىستاۋدا ء«ساتتى سارسەنبى» دەپ اتالاتىن تازالىق اكتسياسى باستالىپ, تۇرعىنداردىڭ, اسىرەسە جاستاردىڭ قولداۋىنا يە بولدى.
اقتاۋ قالاسىن دامىتۋ, كوركەيتۋ باستى نازاردا تۇر. بۇل باعىتتاعى ءىرى جۇمىستار شاعىن قادامداردان باستاۋ الارى انىق. وسى ورايدا اقتاۋ قالاسىنىڭ كوركىن ساقتاۋ, تۇرعىندار مەن تۋريستەرگە جايلى دەمالىس ۇيىمداستىرۋ ماقساتىندا جاعاجايلاردى قوقىستان تۇراقتى تازارتىپ تۇرۋ – ماڭىزدى باستاما.
بۇل باستامانىڭ العاشقى تاڭعى تازالىق جۇمىسىنا ماڭعىستاۋ وبلىسىنىڭ اكىمى ن.قيلىباي, ەكولوگيا جانە تابيعي رەسۋرستار ۆيتسە-ءمينيسترى م.وشۋرباەۆ پەن «جاسىل ەل» ەڭبەك جاساعى, قالا تۇرعىندارى قاتىستى.
اقتاۋ قالاسى ىرگەسىندەگى جاعاجايلار – جازدا حالىق كوپ جينالاتىن ورىن. مۇندا كۇن سايىن ون مىڭعا جۋىق ادام كاسپيدىڭ ءمولدىر سۋىنا ءتۇسىپ, دەمالادى. وكىنىشكە قاراي, ولاردىڭ سوڭىندا جاعالاۋدا ءتۇرلى قوقىس پەن پوليەتيلەن, پلاستيك قۇتىلار قالادى. بۇل جاعداي جاعاجايدا سەنبىلىك جۇمىسىن تەك اكتسيا اياسىندا ەمەس, تۇراقتى قالىپتا جۇگىزۋدى قاجەت ەتەدى. سوندىقتان جاعاجايلاردا ءار سارسەنبى سايىن سەنبىلىك ۇيىمداستىرۋ باستاماسىن ءوڭىر تۇرعىندارى قاجەتتىلىك دەپ ساناپ, قۋانا قابىلدادى. تازالىق ءىس-شاراسىنا قاتىسۋشىلار الا تاڭنان باستاپ بىرنەشە شاقىرىمعا سوزىلىپ جاتقان تەڭىز جاعالاۋىن قوقىستان تازارتىپ, جۇزدەگەن قاپشىقتى كۇل-قوقىسقا تولتىردى. سونىمەن قاتار جاعاجايلاردى اباتتاندىرۋ جۇمىسى جۇرگىزىلدى.
«تابيعات – ءبىزدىڭ تىنىسى-مىز. سوندىقتان قورشاعان ورتانى قورعاۋ, وعان جاناشىرلىقپەن قاراۋ, قامقورلاپ ۇستاۋ – ءاربىر ادامنىڭ ازاماتتىق پارىزى. قولدان كەلگەنشە تابيعاتتى ساقتاۋعا ۇلەسىمىزدى قوسىپ جۇرەيىك», دەگەن ماڭعىستاۋ وبلىسىنىڭ اكىمى نۇرداۋلەت يگىلىك ۇلى ءوڭىر تۇرعىندارى مەن جاستاردى, قوناقتاردى تابيعاتقا بەيجاي قاراماي, تازالىق جۇمىستارىنا ۇيىتقى بولۋعا شاقىردى.
كاسپي جاعالاۋىندا باستاۋ العان اكتسيا ءار سارسەنبى سايىن تۇراقتى تۇردە وتكىزىلەدى. اقتاۋلىق بەلسەندى جاستار بۇل چەللەندجدى جاڭاوزەندىكتەرگە جولدادى.
ماڭعىستاۋ وبلىسى